खोजखबर संवाददाता बाँके असोज १२ गते ।
बाँके प्रहरीले यात्रु सहायता कक्ष संचालनमा ल्याएको छ । चाडवाडका बेला सुरक्षित र भरपर्दो यात्राको कामना गर्दै बाँकेको ५ ठाउँमा यात्रु कक्ष संचालनमा ल्याइएको हो । नेपालगन्ज बसपार्क, कोहलपुर बसपार्क, कोहलपुर चपरगौडी, जमुनाह नाका, खजुरामा सहायता कक्ष संचालनमा ल्याइएको बताइएको छ । नेपालगन्ज बसर्पाकबाट यात्रु सहायता कक्षको शुभारम्भ गरिएको छ ।
नेपालगन्ज उपमहानगरपालिकाका प्रमुख डा. धवलशम्शेर राणा, प्रमुख जिल्ला अधिकारी कुमार खड्का, प्रहरी प्रमुख वीरबहादुर वली, नेपालगन्ज उपमहानगरपालिकाका प्रमुख प्रशासकीय अधिकृत हरि प्याकुरेल, नेपाल राष्ट्रिय यातायात ब्यवसायी महासंघका उपमहासचिव डेकनाथ गौतम लगायतले संयुक्तरुपमा सहायता कक्षको उद्घाटन गरे ।
सो क्रममा नेपालगन्ज उपमहानगरपालिका प्रमुख डा. धवल शम्शेर राणाले दैलेख जाने बसको चालक र सहचाकलाई फूलमाला लगाएर सुरक्षित यात्राका लागि कामना गरे । जिल्ला प्रहरी कार्यालय, बाँकेका प्रमुख वीरबहादुर ओलीले समुदाय–प्रहरी साझेदारी कार्यक्रम अन्तरगत प्रहरी सहायता कक्ष संचालन गरेको बताउँदै चाडपर्वको बेला मानिसहरुले बढी यात्रा गर्ने भएकाले सुरक्षित यात्राका लागि सहायता कक्ष संचालनमा ल्याइएको बताए ।
सडक सभ्यता हाम्रो चाहना, सुरक्षित यात्राको सबैमा शुभकामना भन्ने नाराका साथ शुभारम्भ गरिएको सहायता कक्षको उद्घाटन समारोहमा बाँकेका प्रमुख जिल्ला अधिकारी कुमार बहादुर खड्का, बस व्यवसायीहरुलगायतको सहभागिता रहेको थियो ।
Discussion about this post