बाँके जेठ १० गते ।
नेपालगन्ज उपमहानगरका उपमेयर मोहम्मद कमरुद्धिन राईले निर्वाचनका बेला गरिएको प्रतिवद्धता पूरा गर्न कुनै कसर बाँकी नराख्ने बताएका छन् । उपमेयरको कार्यभार सम्हाल्दै उनले नेपालगन्जलाई सुन्दर र शान्त नगर बनाउन विशेष कार्यक्रम लागू गरिने स्पष्ट पारे ।
उनले आफूलाई परेको समस्याका बारे जानकारी गराउन नेपालगन्जबासीसँग आग्रह गरेका छन् । ‘निर्वाचनका बेला जनता सामु गरेको प्रतिवद्धता पूरा गर्न कुनै कसर बाँकी राख्ने छैन,’ उनले भने, ‘समस्या परे मलाई भन्नुस् । सुनाउनुस् ।’
उपमेयर राईले गरिवीको रेखामुनी रहेका समुदायलाई विशेष सहयोग गर्ने कार्यक्रम ल्याउने बताउँदै उनले अल्पसंख्यक र सिमान्तकृत समुदायका किशोरीलाई उच्च शिक्षा प्रदान गरिने बताए ।
‘पैँसाका कारण कुनै पनि किशोरी शिक्षाबाट बञ्चित हुनुपर्ने छैन । गरिवीको रेखामुनी रहेका समुदायको किशोरीलाई उच्च शिक्षा दिन नेपालगन्ज उपमहानगरले शिक्षा सहयोग कार्यक्रम ल्याउने छ,’ उपमेयर राईले भने ।
उनले नेपालगन्जलाई सफा र सुन्दर नगर बनाउन विशेष ध्यान दिइने बताए । नेपालगन्जको ढल सरसफाई गरि डुबानबाट जोगाउन कर्मचारीलाई निर्देशन दिइसकेको बताए ।
सरसफाईलाई पहिलो प्राथमिकतामा राखेको उनको भनाई छ । ‘सरसफाईमा देखिएको समस्या पहिचान गरि समाधानको प्रयास गरिनेछ,’ उनले भने, ‘सरसफाईमा कुनै कमी नगर्न कर्मचारीलाई निर्देशन दिइएको छ ।’
बालिका र किशोरी शिक्षालाई प्रभावकारी बनाउने बताउँदै उनले नेपालगन्जको कन्या कलेज र विद्यालयको शिक्षालाई अझ गुणस्तरिय बनाइने स्पष्ट पारे । ‘घरका महिला शिक्षित भएमात्र घर शिक्षित हुन्छ । घर शिक्षित भए सहर शिक्षित हुनेछ,’ उनले भने ।
Discussion about this post