बाँके भदौ ४ गते ।
बाँकेमा ६५ किलो मिटर खुला सिमानामा हुने अवैध धन्दा रोक्न खटिएको सुरक्षाकर्मी स्वयम अवैध असुली धन्धामा लागेका छन । भारतसँग खुला सीमाना रहेको बाँकेमा मुख्य नाका बाहेक भित्री नाकाबाट पनि अवैधरुपमा मालसमान तस्करी हुँदै आएको पाइएको छ ।
तस्करहरुले सानो परिमाणमा भरीया मार्फत भन्सार छली गरेर बाँकेका विभिन्न क्षेत्रमा भण्डारण गर्ने र एकमुष्ठ विभिन्न जिल्ला पठाउने गरेको तथ्य अनलाइन खोजखवरले प्राप्त गरेको छ । जमुनाह नाकाको पुर्वतिर खटिएको सशस्त्र प्रहरीले सेटिङमा अवैध सामान भित्र्याउने र पठाउने गरेको अनलाइन खोजखबरले बनाएको भिडियोमा प्रष्ट देखिएकोे छ ।
यहाँसम्मकी तस्करहरुलाई सशस्त्र प्रहरीले सुरक्षा दिइरहेको भिडियोमा स्पष्ट देख्न सकिन्छ । नाकाको पुर्ब पश्चिमतिरको क्षेत्रबाट भारतबाट तस्करसँग मिलेर एसपी जनकराज बस्नेतको निर्देशनमा मातहतको सशस्त्र प्रहरीको सहयोगमा दैनिकरुपमा ठूलो परिमाणमा भन्सार छलेर अवैध सामान भित्र्याउँदा राज्यको करोडौं राजश्व गुमिरहेको छ । सशस्त्र प्रहरी र भन्सारका कर्मचारी असुली धन्दामा लाग्दा तस्करहरु खुलेआम अवैध सामान भित्र्याउन सफल भएका छन् ।
चौलिक्का चोकमा खटिने सशस्त्र प्रहरी तस्करसँगको अवैध सेटिङमा छन् । सशस्त्र प्रहरीका असइ लालबहादुर विसीले तस्करसँग लाइन लिएर अवैध असुली गरिरहेको तथ्य यसअघि अनलाइन खोजखवरले प्रकाशन गरिसकेको छ ।
विसीलाई गणले निगरानीमा राखिसकेको सशस्त्रकै अधिकारीले बताए । स्रोतले दिएको जानकारी अनुसार असइ विसीलाई एसपी जनकराज बस्नेतको आर्शिवाद रहेको छ । विसीमाथिको निगरानी हात्तिको देखाउने दाँत जस्तै भएको सशस्त्रकै अधिकारीहरु बताउँछन् ।
नाकामा सशस्त्रको यो गतिविधि देख्दा यस्तो लाग्छ सशस्त्र प्रहरीलाई नाकामा अवैध असुलिकै लागि खटाइएको हो । सशस्त्रको असुली धन्दाबारे एकजना तस्कर भन्छन्–‘सशस्त्रलाई हामीले मोटो रकम दिएर सामान ओसारपसार गर्ने गरेको छौं । सशस्त्रसँग लाइन नमिले सियो पनि नेपाल छिराउन सक्दैनौं ।’
तस्करहरुले तस्करीको सामान टंकपसरी पिप्रहवामा भण्डारण गरेर दिउँसो र रातीको समयमा नेपालगन्ज ल्याउने गरेका छन । तस्करहरुले भरियाको प्रयोग गरेर अवैध सामान भण्डारण गर्ने र रातीको समयमा ठूला सवारी साधानमा लोड गरेर अन्यन्त्र जिल्ला पठाउने गरेको तस्कर स्वयम बताउँछन् ।
सशस्त्रका माथिल्लो निकायलाई महिनावारी र तल्लो दर्जालाई सामानको अवस्था र मूल्य हेरेर पाँच सय देखि एक हजार रुपैयाँ सम्म लाइन दिने गरिएको तस्करहरु बताउँछन् । एसपी बस्नेतलाई भने महिनावारी मोटो रकम जाने गरेको स्रोत बताउँछ ।
प्रत्येक साइकल र मोटरसाइकलमा ल्याउने सामानको ड्युटीमा खटिने सशस्त्र प्रहरीलाई पाँच सय देखि एक हजार रुपैयाँ दिएर तस्करहरुले ठूलो परिमाणमा अवैध सामान भित्र्याउने गरेका छन् । जमुनाह विओपी पोष्टबाट डिउटीमा खटिने सशस्त्रका जवानदेखि सईसम्म अवैध असुली धन्धामा लागेका छन् ।
तस्करहरुले कपडा, लेडिज शुट, हाडवेयर, आटो पार्टस, चिनी, खाद्यान, रेडबुल, कोकाकोला, मल, रजनीगन्धा, तुलसी, सुपर पावर, सूर्तिजन्य पदार्थ, बिजुली बत्तीको सामान लगायतका अवैध सामान राजस्व छलेर भित्र्याउने गरेका छन् ।
संघीय सरकारकै निर्देशनमा सशस्त्र प्रहरीले नाकामा हुने अवैध चोरी तस्करी रोक्न ठाउँठाउँमा विओपी पोष्ट स्थापना गरेको छ । आयात–निर्यातलाई ब्यवस्थित वनाउन सिमा नाकामा भन्सार कार्यालय राखिएका छन् । सिमाको सुरक्षा तथा चोरी तस्करी नियन्त्रण गर्नकै लागि सशस्त्र प्रहरी खटाइएका छन् ।
अझ पछिल्लो समयमा सशस्त्र प्रहरीका बोर्डर आउट पोष्ट (बिओपी) थप्ने क्रम जारी नै छ । बाँकेमा मात्रै ८ वटा यस्ता पोष्टहरु छन् । रात दिन गस्ती भइरहेको पनि सशस्त्र बताउँछ । तर उनीहरुको गस्ती भने तस्करको सुरक्षाका लागि हुने गरेको देखिएको छ । प्रहरी राज्यप्रति असहयोगी र तस्करमैत्री भइदिँदा राजश्व संकलनको अवस्था भने चिन्ताजनक छ । सशस्त्र तस्करसँग मिल्दा नेपाली व्यवसायी मारमा परेका छन् ।
तरस्करहरुले नेपालबाट भारततर्फ पनि सामान लैजाने गरेका छन् । नेपालबाट केराउ, जडिबुटी, सुपारी, लगायतका सामान भारत लैजाने गरेका छन । जाउआउका लागि उनीहरुले पाँच सय देखि एक हजार रुपैयाँ डिउटीमा रहेका सशस्त्रलाई बुझाउने गरेको तस्करले बताउँछन् । एसपी देखि बिओपी इन्चार्जलाई लाखौं रुपैया महिनावारी बुझाउने गरेका छन ।
भारतबाट तस्करी गरि ल्याइएको अवैध भन्सार छलीको सामान चर्को मूल्यमा बाँकेसहित बर्दिया, सुर्खेत, जुम्ला, दाङ काठमाडौं लगायतका पहाडी जिल्लाहरुमा सप्लाई गरिन्छ । जसका कारण राज्य कोषमा जम्मा हुने ठूलो रकम सशस्त्रको पोल्टामा परेको छ ।
तस्करहरुले भारतीय पुलिसलाई ६ लाख भन्दा बढी महिनावारी बुझाउने गरेको स्रोतले बताउँछ । सशस्त्र प्रहरी र भन्सार कर्मचारीको मिलेमतोमा हुने अवैध तस्करी रोक्न सिडिओेको प्रभावकारी भूमिका देखिएको छैन । सशस्त्र प्रहरीको अवैध असुलीबारे संचारमाध्यममा छ्यापछ्याप्ती आउँदा पनि गृहप्रशासन मौन बस्दा उनीहरु पनि तस्करको चंगुलमा फसेको नागरिकहरु आंशका गर्छन् ।
Discussion about this post