काठमाडौं कात्तिक ६ गते ।
निर्वाचन आयोगले प्रतिनिधिसभा र प्रदेशसभा सदस्यका लागि समानुपातिक उम्मेदवारको बन्दसूचीबाट ३८५ जनाको हटाउने तयारी गरेको छ ।
गत बैशाख ३१ गते सम्पन्न स्थानीय तहको निर्वाचनमा उम्मेदवार भएर निर्वाचन खर्चको विवरण नबुझाएर शनिबारसम्म तोकिएको जरिवान नतिर्ने ३८५ जना उम्मेदवारको नाम आयोगले हटाउने तयारी गरेको हो ।
दुवै सभाको बन्दसूचीमा नाम परेकामध्ये ४३९ जनाले समयमै निर्वाचन खर्च विवरण नबुझाएका कारण जरिवाना तिनुपर्ने सूचीमा परेका थिए । आयोगले उनीहरूलाई शनिबारसम्म जरिवाना बुझाउने समय तोकेको थियो ।
तोकिएको समयभित्र ५४ जनाले मात्रै जरिवाना बुझाएको आफुलाई जानकारी आएको प्रमुख निर्वाचन आयुक्त दिनेशकुमार थपलियाले नेपाल प्रेससँग बताए ।
उनका अनुसार बन्दसूचीमा रहेकामध्ये ३२ जनाले कात्तिक १ गतेसम्मसम्म जरिवाना बुझाइसकेका थिए ।बुधबारदेखि शनिबारसम्म २२ जनाले मात्रै जरिवाना बुझाएको र शनिबारसम्म जरिवाना नतिर्नेको नाम बन्दसूचीबाट हटाइने थपलियाको भनाई छ ।
आयोगले स्थानीय तहको निर्वाचन खर्चको विवरण नबुझाउने १ लाख २३ हजार भन्दा बढी उम्मेदवारलाई डेढ लाखदेखि साढे ७ लाखसम्म जरिवाना गराउने निर्णय भदौ ३१ गते गरिसकेको छ ।
जरिवाना नतिर्ने व्यक्तिले ६ वर्षसम्म कुनै पनि निर्वाचनमा भाग लिन नपाउने पनि आयोगले निर्णय गरेको छ ।
Discussion about this post