कास्की माघ १ गते ।
पोखरामा आइतबार भएको यति एयरलाइन्सको–एन एएनसी एटीआरको विमान दुर्घटनामा १६ जनाको शव निकालिएको छ।
बिहान काठमाडौँबाट ६८ जना यात्रु र चालक दलका चार जना सदस्य लिएर पोखराका लागि उडेको यती एयरलाइन्सको–एन एएनसी एटीआर आइतबार बिहान सेती दोभानमा खसेको थियो।
सैनिक प्रवक्ता सहायकरथी कृष्णप्रसाद भण्डारीका अनुसार हालसम्म १६ जनाको शव निकालिएको छ भने बाँकीको खोजिकार्य भइरहेको छ।
उनले भने,’१६ जनाको शव निकालिएको छ। आगोको मुस्लोले उद्धारमा समस्या भएको छ। बाँकी शव निकाल्ने प्रयास भइरहेको छ। विमान टुक्रा टुक्रा भएको छ।’ काठमाडौँबाट बिहान १०ः३३ बजे पोखराका लागि उडेको यती एयरलाइन्सको एटीआर–७२ विमान दुर्घटना भएको हो।
यती एयरलाइन्सका प्रवक्ता सुदर्शन बर्तौलाका अनुसार विमानमा दुई पाइलट, दुई जना एयर होस्टेस र ६८ जना यात्रु सवार थिए। उनका अनुसार अवतरण गर्ने क्रममा पुरानो र नयाँ विमानस्थलको बीचमा ९एन–एएनसी एटीआर–७२ विमान सेती नदी किनारमा दुर्घटना भएको हो।
Discussion about this post