बाँके मंसिर ९ गते ।
बाँकेको राप्तीसोनारी गाउँपालिका–९ जनता माविमा शनिवार भएको निःशूल्क स्वास्थ्य शिविरमा ६१५ जनाले सेवा लिएका छन् । राप्तीसोनारी गाउँपालिकाले बाँके राष्ट्रिय निकुञ्ज सुरक्षार्थ तैनाथ अर्जुनबाण गण ओभरी र एचसीआरसीसँगको समन्वय र सहकार्यमा आयोजना गरिएको स्वास्थ्य शिविरमा ६१५ जनाले १ हजार ११२ प्रकारका सेवा लिएको राप्तीसोनारी गाउँपालिकाका स्वास्थ्य शाखा प्रमुख देवेन्द्र केसीले जानकारी दिनुभयो । उहाँका अनुसार स्थानीयबासीलाई घरदैलोमै विशेषज्ञ स्वास्थ्य सेवा दिने उद्देश्यका साथ शिविर आयोजना गरिएको हो ।
स्त्री तथा प्रसूति सेवा ११२ जनाले, अर्थोपेडिक सेवा २४८ जनाले, मेडिसिन सेवा २५० जनाले, छाला रोग उपचार सम्वन्धी सेवा ६२ जनाले, इएनटी सेवा २६१ जनाले र मुटु रोग सम्वन्धी सेवा ८० जनाले लिएको केसीले बताउनुभयो । त्यसमा ३२ जनाले ल्याव सेवा र ४५ जनाले इसीजी सेवा समेत लिएका थिए ।
अर्जुनबाण गणका अर्थोपेडिक सर्जन डा.अमृतरत्न शाक्य, नेपाली सेनाकै फिजिसियन डा.सुरेश कायस्थ, भेरी अस्पतालका कार्डियोलोजिष्ट डा.विकास नेपाल, डर्माटोलोजिष्ट डा.कमलजंग शाही, स्त्री तथा प्रसूति रोग विशेषज्ञ डा. मञ्जु विसी शाह, इएन्टी सर्जन डा.कविर वास्तोलासहित पालिकाका १५ जना स्वास्थ्यकर्मीले बिरामीलाई सेवा दिनुभएको थियो । निःशूल्क स्वास्थ्य शिविरको गाउँपालिकाका अध्यक्ष तप्तबहादुर पौडेलले उद्घाटन गर्दै विशेषज्ञ चिकित्सकसहितका यस्ता शिविरले स्वास्थ्य सेवासँगको पहुँच स्थापित हुने बताउनुभयो ।
गाउँपालिकाका उपाध्यक्ष मनिषा थारुले पालिकाले स्वास्थ्य सेवालाई प्राथमिकता दिएर काम गरिरहेको बताउनुभयो । बाँके राष्ट्रिय निकुञ्ज सुरक्षार्थ तैनाथ अर्जुनबाण गण ओभरीका निमित्त गणपति गंगाधर खत्रीले स्थानीय सरकारले आयोजना गरेको शिविरमा समन्वय र सहकार्य गर्न पाउँदा खुशी लागेको बताउनुभयो । स्वास्थ्य शाखा प्रमुख केसीले संचालन गरेको उक्त कार्यक्रममा वडा नं.९ का वडाअध्यक्ष सोहनलाल थारुले स्वागत मन्तव्य व्यक्त गर्नुभएको थियो ।
Discussion about this post