बाँके मंसिर १५ गते ।
राप्तीसोनारी गाउँपालिकामा वडा शिक्षा समिति गठनलाई तीब्रता दिइएको छ । वडाअध्यक्षको संयोजकत्वमा वडा समिति गठनलाई तीब्रता दिइएको हो । यसैक्रममा विहीबार वडा नं.५ मा शिक्षा समिति गठन गरिएको छ । वडा अध्यक्षका अध्यक्षतामा समिति गठन गरिएको हो । समितिको सदस्यहरुमा शेर बहादुर वली, रेगबहादुर खड्का, खिमराज थापा रहेका छन् ।
यस्तै बुधवार वडा नं ४ मा ७ सदस्यीय समिति गठन गरिएको छ । वडाअध्यक्ष मिनराज खड्काको अध्यक्षतामा नुमा विक, कान्छा थारु, दिलबहादुर थारु, ध्रुव विक्रम चन्द, लक्ष्मी चौधरी सदस्य रहने गरी समिति गठन गरिएको छ । यस्तै सदस्य सचिवमा वडा सचिव होम सूर्य केसी रहेका छन् ।
यस्तै वडा नं. ६, ७ र ८ मा शिक्षा समिति गठन भइसकेको राप्तीसोनारी गाउँपालिकाका शिक्षा तथा खेलकुद शाखा प्रमुख जीवन न्यौपानेले जानकारी दिए । उनका अनुसार स्थानीय शिक्षा एने २०७७ को दोस्रो संशोधन दफा १८ (क) बमोजिम वडा शिक्षा समिति गठन गर्ने व्यवस्था गरेको छ । उक्त व्यवस्था अनुसार वडास्तरमा पनि शिक्षा समिति गठन गर्न थालिएको उनले बताए । स्थानीय सरकार संचालन ऐनले वडालाई पनि शिक्षा सम्वन्धी अधिकार दिएको छ ।
वडालाई दिएको उक्त अधिकारको प्रभावकारी कार्यान्वयनका लागि पनि शिक्षा समितिको भूमिका महत्वपूर्ण हुने उनले बताए । स्थानीय सरकार संचालन ऐनले वडालाई बाल विकास केन्द्र स्थापना, बाल उद्यान निर्माण, शैक्षिक योजना निर्माण, भौतिक पूर्वाधार योजना माग, अनुगमन लगायतको अधिकार दिइएको छ ।
यसको प्रभावकारी कार्यान्वयनका लागि शिक्षा समितिको महत्वपूर्ण भूमिका हुने उनले बताए । उक्त समितिमा वडाअध्यक्ष स्वतः अध्यक्ष र वडा सचिव सदस्य सचिव हुने व्यवस्था छ । अन्य सदस्यहरु भने स्थानीयको छलफल र भेलाबाट टुंगो लगाउने गरिएको छ । वडा शिक्षा समितिले प्रभावकारी काम गर्न सक्यो भने स्थानीय सामुदायिक विद्यालयको शैक्षिक गुणस्तरमा ठूलो सुधार आउने पालिका अध्यक्ष तप्तबहादुर पौडेलले बताए ।
विद्यालयको समस्या, समाधान र सम्भावना सबै वडा शिक्षाले हेर्न सक्छ, सम्भव भएका त्यही टुंग्याउने र सम्भव नभएका सवाललाई पालिकाबाट टुंग्याउन सकिने उनको भनाइ छ ।
Discussion about this post