बाँके पुस १८ गते ।
‘तरकारीमा विषादी नहाल्दा उत्पादन कम हुन्छ, तर विषादीरहित तरकारी फलाएर खुवाउन पाउँदा आत्मसन्तुष्टि र गर्व लागेको छ’ कोहलपुर नगरपालिका–६ रझेनाकी रुपा थारु भन्छिन् । बजारमा पाइने विषादीयुक्त तरकारीबाट क्यान्सरजन्य रोग लाग्ने थाहा पाएपछि उनी विषादीरहित तरकारी खेतीमा लागेको बताउँछिन् ।
आफूले लगाएको काउली देखाउँदै उनले भनिन्–‘हेर्नुस् त, बोट कस्तो छ ?’ विषादीरहित तरकारी विषादी हालिएको तुलनामा कम चम्किलो र आकर्षक देखिन्छ ।’ कोहलपुर नगरपालिका–५ र ६ का २५ जना किसानहरु एकिकृति शत्रुजीव व्यवस्थापन(आइपिएम) कृषक पाठाशाला समूहमा आवद्ध छन् । यसअघि बनिसकेका समूहलाई कोहलपुर नगरपालिकाले छनौट गरी आइपिएम कृषक पाठशाला समूह बनाउने गरेको छ ।
यसअघि यो समूहको नाम फुलवारी कृषक समूह थियो । परम्परागत तरकारी खेतीलाई परिष्कृत गर्दै किसानहरुलाई विषादीरहित तरकारी उत्पादनमा आकर्षित गर्ने गरी कोहलपुर नगरपालिकाले चालू आर्थिक वर्षमा दुई ठाउँमा आइपिएम कृषक पाठशाला सुरु गरेको छ । रझेनामा काउली र वडा नं.१० मा आलुबाली । मंगलवार काउलीबालीको अनुगमन गर्न पुगेको नगर प्रमुख पूर्ण प्रसाद आचार्यसहितको टोलिसँगै किसानहरुले साक्षात्कार गरेका थिए ।
आइपिएम कृषक पाठशालाले विषादीरहित काउलीबाली उत्पादन गर्दैछ । करिव डेढ कठ्ठा जमिनमा लगाइएको काउली तयार हुने अवस्थामा छ । अघिल्लो वर्षसम्म विषादीको प्रयोग गर्दै आएका किसानहरु यो पटक पनि विषादीरहित तरकारीखेती गरिरहेका छन् । विषादीको प्रयोगले कृषकलाई समेत असर पुग्छ । विषादीको विकल्पमा कृषकले गाईको गहुँत, मोही, विभिन्न किसिमका झारपातको झोलबाट जैविक विषादी बनाएर खेतीमा प्रयोग गर्ने गरेको अतिना चौधरी बताउँछिन् ।
विषादीरहित तरकारीखेती गरेका कृषकले आफ्नो उत्पादन बजार उचित मूल्यमा बेच्ने वातावरण सिर्जना गरिदिन माग गरेका छन् । त्यसक्रममा नगर प्रमुख आचार्यले विषादीरहित तरकारी व्यवसायिकरुपमा उत्पादन हुने हो भने बजारीकरणको समस्या नहुने बताए । उनले त्यसका लागि नगरपालिकाले गर्नुपर्ने सहयोगको प्रतिबद्धता समेत जनाए । नगर प्रमुख आचार्यले दुईवटा कृषक समूहलाई आर्थिक वर्षमा विषादीरहित तरकारीखेतीका लागि आवश्यक सहयोग गरिएको बताए ।
प्रमुख प्रशासकीय अधिकृत धोलकराज ढकालले विषादीरहित तरकारी उत्पादनमा पालिकाले जोड दिने बताए । पालिकाका कृषि शाखा प्रमुख चन्द्रबहादुर बुढाले विषादीलाई न्यूनीकरण गर्ने उद्देश्यका साथ यो कार्यक्रम लागू गरिएको बताए । शत्रुजीव मार्ने, मित्रजीव जोगाउने, रासायानिक विषादी निरुत्साहित गरी जैविक विषादीको प्रयोग बढाउने पनि यो कार्यक्रमको उद्देश्य रहेको उनको भनाइ छ । गएको वर्ष वडा नं.४ र वडा नं.१५ मा आइपिएम कृषक पाठशाला कार्यक्रम लागू गरिएको थियो । आइपिएम कृषक पाठशालालाई नगरपालिकाले विउविजन, मल तथा प्राविधिक सहयोग गर्ने गरेको छ ।
Discussion about this post