बाँके माघ २७ गते ।
एक वर्षअघि संघीय संसदको निर्वाचनको वर्ष थियो । त्यतिबेला मोहम्मद इस्तियाक राई थिए भौतिक पूर्वाधार तथा यातायात मन्त्री । उनले बाँकेको विकासका लागि धेरै योजना ल्याए त्यतिबेला ।
चुनावताका भए पनि उनलाई आफूले ल्याएका योजनाको शिलान्यास गर्न भ्याई नभ्याई थियो । उनले बाँके क्षेत्र नं. २ को बृहत्तर विकासका लागि गूरु योजना बनाए र सोही अनुसार योजना ल्याए ।
पूर्व मन्त्री राईले जमुनाहदेखि कोहलपुरसम्मको सडक अस्फाल्ट प्रविधिबाट कालोपत्रे गराए । नेपालगन्जको पुष्पलाल चोकदेखि राप्ती नदिको सिधनियाघाटसम्मको हुलाकी सडकलाई आठ मिटर बनाउने योजना ल्याए । हाल उक्त सडक आठ मिटर चौडा निर्माण सम्पन्न हुने क्रममा छ ।
उनले नन्दनी मिलदेखि बर्दियाको सदरमुकाम गुलरियासम्मको सडक आठ मिटर चौडाई सहित अस्फाल्ट प्रविधिबाट कालो पत्रे गर्ने वजेट विनियोजन गरि योजना कार्यान्वयनमा ल्याएका थिए । उक्त सडक पनि निर्माण पूरा हुने क्रममा छ ।
आफूले ल्याएको योजनाको चुनावका बेला शिलान्यास गरेको भन्दै धेरैले खिल्ली उडाए । कतिपयले मजाक पनि गरे । विपक्षी दलका नेता, कार्यकर्ताले शिलान्यास मन्त्री भन्न पनि भ्याए । तर, उनले नेपालगन्जका लागि मात्र नभई सिंगो बाँकेबासीका लागि योजना ल्याए । उनले सरकारसँग वजेट नभए पनि बाहिरबाट रकम खोजेर नेपाल रेडक्रस सोसाइटी, रक्त संचार केन्द्र नेपालगन्जको भवन बनाउने आँट गरे । भेरी अस्पताल परिसरमा उक्त भवन निर्माणाधिन अवस्थामा छ ।
उनले नेपालगन्ज र कोहलपुरमा आकासे पुल र ट्राफिक लाइट जडानको योजना ल्याएका थिए । ट्राफिक लाइट जडान भई संचालनको तयारीमा भए पनि आकासे पुल बन्ने अनिश्चित छ । आकासे पुलका लागि खनेका खाल्दा पुरिएका छन् । वजेटको सुनिश्चितता सहित ल्याएको योजना कार्यान्वयनमा ल्याउन अहिलेका जनप्रतिनिधिले चासो नदेखाउँदा आकासे पुल निर्माण अनिश्चित बनेकोे पूर्व मन्त्री राईले बताए ।
उनकै पालामा कारकाँदो चोकदेखि नन्दनी मिलसम्मको सडक निर्माण भएको थियो ।
पूर्वमन्त्री राईले ल्याएका योजना अहिले कार्यान्वयनको चरणमा छन् । तर, उनले ल्याएका योजना बाहेक अहिले बाँकेमा योजना आएको देखिदैन ।
Discussion about this post