ओभरलोड बोकेका ट्याक्टर र टिप्पर आउँदा आँखा चिम्लिन्छन् ट्राफिक प्रहरी

बाँके चैत ७ गते ।
नेपालगन्ज–सिधनियाघाट रोडमा रात–दिन ट्राफिक प्रहरी खटिन्छन् । बेला बखत बाइक र गाडी चेक जाँच पनि गर्छन् । लाइसेन्स र ब्लुबुक नभएका सवारी चलाकलाई जरिवाना तिराउँछन् । तर गिट्टी, बालुवा, ढुंगा र मोरङ्ग ओभरलोड बोकेका टिप्पर एवं ट्याक्टर आयो भने आँखा चिमलिन्छन् । देखेर पनि नदेखेकझैँ गर्छन् ।

ओभरलोड ल्याउने ट्याक्टर र टिप्परसंग ट्राफिक प्रहरीले मोटो रकम लिएर छाड्ने गरेको स्वयम टिप्पर तथा ट्याक्टर चालक गुनासो गर्छन् । ‘जसले रकम बुझाउँदैन उसको ट्याक्टर र टिप्परले ओभरलोड ल्याउन पाउँदैन । हामीले ट्राफिक प्रहरीलाई रकम नियमित बुझाउनु पर्छ,’ नाम नबताउने सर्तमा एक ट्याक्टर चालकले भने ।

सिधनिया रोडमा दैनिक सय वटा ट्याक्टर र ५० बढी टिप्पर ओहारदोहर गर्छन् । राप्ति नदिवाट गिट्टी, बालुवा, मोरङ्ग र ढुंगा ओसार्ने यी ट्याक्टर तथा टिप्पर मध्ये अधिकाशले ओभरलोड ल्याउँछन् । ट्याक्टर र टिप्परले ओभरलोड बोक्न नपाउने नियम छ । यसको नियमन गर्न ट्राफिक प्रहरीको बिट फुल्टेक्रामा राखिएको छ । यसको अधिकार क्षेत्र सिधनिया घाटसम्म छ ।

तर यहाँ खटिएका ट्राफिक प्रहरीले मोटो रकम लिएर ओभरलोड बोकेका गाडीलाई छोड्ने गरेका छन् । ‘ओभरलोड बोकेका गाडी ट्राफिक र जनपद प्रहरीको अगाडीबाट जान्छन, त्यहाँ खटिएका प्रहरीले नदेखेझै गर्छन्,’ एक प्रत्यक्षदर्शीले भने ।