बाँके, भदौ ३० गते ।
पटक–पटक समय र लागत थपिँदै आएको सिक्टा सिँचाइ आयोजना अब पाँच वर्षभित्र पूरा गर्ने लक्ष्यसहित निर्माणलाई तीव्रता दिइएको छ। बाँकी संरचना निर्माणका लागि आयोजनाले थप ३० वटा बोलपत्र आह्वान गरेको छ।
सरकारले पाँच वर्षभित्र आयोजना सम्पन्न गर्न निर्देशन दिएपछि शाखा, उपशाखा र प्रशाखा नहर निर्माणलाई प्राथमिकतामा राखेर काम अघि बढाइएको आयोजना निर्देशक राजु आचार्यले बताए। उनका अनुसार बजेट र आवश्यक जनशक्तिको अभाव नहुने हो भने तोकिएको अवधिभित्र बाँकी पूर्वाधार निर्माण सक्न सकिन्छ। आयोजनाको हालसम्म ५१ प्रतिशत भौतिक प्रगति भएको छ भने करिब २४ अर्ब रुपैयाँ खर्च भइसकेको छ।
आयोजनाका सूचना अधिकारी मनोजकुमार साहका अनुसार ४५ किलोमिटर पश्चिम मूल नहर निर्माण भइसकेको छ। सिधनिया, अकलघरुवा र गुरुवागाउँ शाखा नहर सम्पन्न हुने चरणमा छन् भने डुडुवा शाखा नहरको निर्माण जारी छ।
करिब १६ हजार हेक्टरमा सिँचाइ पु¥याउने लक्ष्य राखिएको डुडुवा शाखा नहर ठेकेदारसँगको विवाद र अदालतमा मुद्दा विचाराधीन रहेपछि लामो समय रोकिएको थियो। विवाद समाधान भएपछि गत वर्ष नयाँ ठेकेदारमार्फत निर्माण पुनः सुरु गरिएको साहले बताए।
सिक्टाको निर्माण अवधि र लागत पटक–पटक संशोधन हुँदै आएको छ। पहिलो गुरुयोजनाले १२ अर्ब ८० करोड रुपैयाँ लागतमा आर्थिक वर्ष २०७०/७१ सम्म आयोजना सक्ने लक्ष्य राखेको थियो। संशोधित गुरुयोजनाले लागत २५ अर्ब दुई करोड रुपैयाँ पु¥याएर २०७६/७७ सम्म सम्पन्न गर्ने लक्ष्य राखे पनि त्यो अवधिमा आयोजना पूरा भएन।
२०७९ मा स्वीकृत गुरुयोजनाले आयोजनाको कुल लागत ५२ अर्ब ८९ करोड रुपैयाँ पु¥याउँदै आर्थिक वर्ष २०८९÷९० सम्म सम्पूर्ण काम सक्ने लक्ष्य निर्धारण गरेको छ। अब भने सरकारले बाँकी काम पाँच वर्षभित्र पूरा गर्ने गरी निर्माणलाई गति दिन निर्देशन दिएको छ।
आर्थिक वर्ष २०६२/६३ मा सुरु भएको सिक्टाअन्तर्गत राप्ती सोनारी गाउँपालिका–१ अगैयामा राप्ती नदीमाथि ३१७ मिटर लामो ब्यारेज निर्माण भएको छ। आयोजनाले बाँकेको ४२ हजार ७६६ हेक्टर भूमिमा सिँचाइ सुविधा पु¥याउने लक्ष्य लिएको छ। हालसम्म करिब २५ हजार हेक्टरमा सिँचाइ सुविधा पुगेको आयोजना निर्देशक आचार्यले बताए।
Discussion about this post