बाँके चैत १४ गते ।
गर्मी मौसम सुरु हुने बित्तिकै नेपालगन्ज लगायत तराईका जिल्लाहरूको जनजीवन प्रभावित हुने गर्दछ । नेपालगन्जमा गर्मी बढ्न सुरु भएसँगै सरकारी स्तरबाट निर्माण गरिएको पौडी पोखरी सञ्चालनमा आएको छ । नेपालगन्ज रङ्गशालामा रहेको पौडी पोखरी सञ्चालनमा आएपछि दैनिक पौडी खेल्न आउनेको संख्या बढ्दै गएको छ ।
अहिले दैनिक रूपमा ५० भन्दा बढी सर्वसाधारण पौडी खेल्न आउने गरेको साबिक मध्यपश्चिम क्षेत्रीय खेलकुद विकास समिति लुम्बिनी प्रदेश नेपालगन्ज प्रमुख महेश चन्दले बताए । चैत १ देखि सञ्चालनमा आएपछि क्रमशः पौडी खेल्न आउनेको सङ्ख्या बढिरहेको उनले जानकारी गराए । पछिल्लो समय नेपालगन्जमा पौडी पोखरीमा आएर खेल्नेहरूको सख्ंया बढ्दै गएको चन्दले बताउनुभयो । नेपालगन्ज रङ्गशालामा भएको पौडी पोखरी स्तरीय भएकोले सर्वसाधारणको रोजाइमा पर्ने गरेको चन्दको भनाइ छ ।
उनले भने, ‘‘नेपालगन्ज रङ्गशालाको पौडी पोखरी अन्तर्राष्ट्रिय मापदण्ड अनुसार निर्माण गरिएको हो । यहाँ सर्वसाधारण र खेलाडीहरूले अभ्यास गर्न सहज छ । त्यसैले पनि धेरै रोजाइमा रङ्गशालाको पौडी पोखरी परेको हो ।’’ राष्ट्रिय स्तरको प्रतियोगिता गर्ने उद्देश्यले राष्ट्रिय खेलकुद परिषद् (राखेप) ले २०५६ सालदेखि नेपालगन्जमा पौडी पोखरीको निर्माण कार्य सुरु गरेको थियो । तर, पौडी पोखरी भने नेपालगन्जमा २०७६ सालमा भएको आठौँ राष्ट्रिय खेलकुद पश्चात् निर्माण कार्य सम्पन्न भएको थियो ।
साबिक मध्यपश्चिम क्षेत्रीय खेलकुद विकास समिति लुम्बिनी प्रदेश नेपालगन्जले हाल पौडी पोखरीको व्यवस्थापनको कार्य गरिरहेको छ । पौडी पोखरीको व्यवस्थापनमा खटिएका कर्मचारी र व्यवस्थापन खर्चलाई धान्न सक्ने गरी शुल्क निर्धारण गरिएको कार्यालय प्रमुख चन्दले बताए। उनले भने, ‘‘हरेक सिजनमा पौडी पोखरी व्यवस्थापनमा लाखौं रुपैयाँ खर्च हुन्छ । व्यवस्थापनलाई सहयोग होस भनेर हामीले थोरै शुल्क राखेका छौँ ।
यसले पौडी पोखरी सञ्चालनमा सहयोग पुग्नेछ ।’’ कार्यालय प्रमुख चन्दका अनुसार सर्वसाधारणहरूको लागि प्रतिव्यक्ति दुई सय र विद्यार्थीहरूको लागि एक सय रुपियाँ शुल्क निर्धारण गरिएको छ । राष्ट्रिय खेलाडीहरूको लागि एक सय र अन्तर्राष्ट्रिय खेलाडीको लागि निःशुल्क व्यवस्था गरिएको पनि चन्दले बताए । पौडी पोखरीको व्यवस्थापनमा नियमित रूपमा तीन जना कर्मचारीले काम गरिरहेका छन् । पौडी पोखरीमा संघ र क्लबहरूले प्रतियोगिता आयोजना गरे सहुलियत दरमा उपलब्ध गराउने चन्दले बताए ।
Discussion about this post