बाँके बैशाख ३१ गते ।
भारतको बहराइच जिल्लामा भइरहेको लोकसभा अन्तरगत चौथो चरणको निर्वाचनलाई मध्यनजर गरि नेपाल–भारत सीमानाका जमुनाह तीन दिनका लागि बन्द भएपछि सर्वसाधारणलाई आउजाउ गर्न समस्या भएको छ ।
आज भइरहेको निर्वाचनको सुरक्षालाई मध्यनजर गरि बैशाख २९ गते (शुक्रवार) मध्यरातदेखि जमुनाह नाका पूर्णरूपमा बन्द गरिएपछि सर्वसाधारणलाई आउजाउमा समस्या भएको हो ।
नाका आज मध्यरातबाट खुल्ला गरिने भए पनि जेठ १ गते विहानबाट मात्र नाका सर्वसाधारणका लागि खुल्ने भएको छ ।
एम्बुलेन्स र सुरक्षाकर्मीको सवारी साधन बाहेक अन्यलाई पैदल यात्रासमेत गर्न रोक लगाइएपछि भारतबाट नेपाल आउने र नेपालबाट भारत जानेहरु अलपत्र परेका छन् । नेपाल आउन र भारत जान नपाएकालाई इलाका प्रहरी कार्यालय जमुनाहले भारतीय सुरक्षाकर्मीसँग समन्वय गरि गन्तब्यसम्म जाने ब्यवस्था मिलाएको इन्चार्ज सई रविन्द्रबहादुर बमले जानकारी दिए ।
उनले भारतका विभिन्न ठाउँबाट आएर रुपइडिहामा आएर अलपत्र परेका नेपालीलाई भारतीय सुरक्षाकर्मीको सहयोगमा नेपालगन्ज ल्याइएको बताए ।
‘अन्तर्राष्ट्रिय कानुन बमोजिम ७२ घण्टासम्म सिमा नाका वारपार गर्न पाइदैन, तर हामीले भारतीय सुरक्षाकर्मीसँग अनुरोध गर्यौँ र उहाँहरुले मान्नु भयो । दुई देशका सुरक्षाकर्मीको रोहवरमा रुपइडिहामा अलपत्र परेका नेपालीलाई नेपाल ल्याउन सफल भयौँ,’ उनले भने ।
७२ घण्टाको अवधिमा झण्डै तीन हजार नेपालीलाई रुपइडिहाबाट नेपालगन्ज ल्याएर गन्तब्यसम्म जान सहयोग गरेको उनको भनाई छ । उनले भने, ‘रुपइडिहामा अलपत्र परेका नेपालीलाई यता ल्यौँ र नेपालगन्जबाट भारतका विभिन्न ठाउँमा जाने करिव चार हजार नेपालीलाई त्यता पठाउन सफल भयौँ ।’ जमुनाह नाका बन्द छ भन्ने जानकारी नपाउँदा धेरै सर्वसाधारणले दुख पाएको उनको भनाई छ ।
Discussion about this post