बाँके जेठ ६ गते ।
बाँकेको राप्ती सोनारी गाउँपालिकाले आजदेखि किसानहरुलाई धानको वीउ वितरण सुरु गर्ने भएको छ ।
संघीय सरकारबाट प्राप्त खाद्यान्न बालीमा उन्नत वीउ उपयोग कार्यक्रम अन्तर्गत ५० प्रतिशत अनुदानमा किसानहरुलाई धानको वीउ वितरण गर्न लागिएको राप्ती सोनारी गाउँपालिकाका कृषि शाखाका नायव प्राविधिक सहायक खड्क खत्रीले जानकारी दिए ।
उनका अनुसार कृषि शाखामा धानको वीउ माग गरेका कृषि सहकारीलाई छनौट गरी छनौटमा परेका कृषि सहकारीमार्फत किसानलाई अनुदानको वीउ वितरण गर्न लागिएको हो । राप्ती सोनारी गाउँपालिकाका वडा नं.१ र ५ बाहेक अन्य सबै वडामा किसानहरुलाई अनुदानको वीउ उपलब्ध गराइने पनि खत्रीले बताए ।
उनका अनुसार वडा नं.२ बाट धानको वीउ वितरण सुरु गरिनेछ । वडा नं.२ मा ४० क्विन्टल, वडा नं.३ मा ४५, वडा नं.४ मा ९० क्विन्टल, वडा नं.६ र ७ मा ४०–४० क्विन्टल, वडा नं.८ मा २३ र वडा नं.९ मा २० क्विन्टल धानको वीउ वितरण गरिनेछ । पालिकाले दुई सय ९८ क्विन्टल राधा–४ जातको धान खरिद गरेर ५० प्रतिशत अनुदान दिएर किसानलाई वितरण गर्न लागेको हो ।
त्यसका लागि संघीय सरकारले १० लाख २५ हजार रुपैयाँ बजेट पठाएको थियो । उक्त बजेटबाट ढुवानीसहित पालिकाले अनुदान वितरण गर्न लागेको हो । राप्ती सोनारी गाउँपालिका धान उत्पादनका लागि बाँकेकै उत्कृष्ट पालिका मध्येमा पर्छ । राप्ती सोनारीमा करिव ८ सय ५० हेक्टर जमिनमा धान खेती हुने गरेको छ ।
करिव दुई हजार ७ सय मेट्रिकटन धान उत्पादन हुन अनुमान गरिएको छ । राप्ती सोनारी गाउँपालिकाका अध्यक्ष तप्त बहादुर पौडेलका अनुसार किसानलाई वीउविवजनदेखि प्राविधिक सहयोग पालिकाले गर्दै आएको छ । उन्नत जातको धानको वीउ वितरण गर्दै अध्यक्ष पौडेलले परम्परागत खेती प्रणाली हराउँदै गएको अवस्थामा आधुनिक खेती प्रणालीमा किसानलाई आकर्षित गर्न उन्नत जातको धानको वीउ वितरण गरिएको बताए ।
अध्यक्ष पौडेलले धानको बीउसँगै किसानलाई कृषिऔजार तथा उपकरणहरू समेत पालिकाले वितरण गर्ने गरेको बताए । गाउँपालिका अध्यक्ष पौडेलले भने, ‘किसानलाई आर्थिक रूपमा समृद्धि बनाउनका लागि पालिकाले वीउदेखि यान्त्रीकरणमा सहयोग गर्ने कार्यक्रम रहेको छ । त्यही क्रममा अहिले बीउ वितरण गरेका छौँ, अव यान्त्रीकरण पनि सहयोग गर्ने छौँ ।’ प्रविधिका माध्यमबाट कृषि व्यवसायलाई सहज बनाउन सहयोग गर्ने उनको भनाइ छ ।
पालिकाले कृषि क्षेत्रको उत्पादन र उत्पादकत्व बढाउने गरी नीति तथा कार्यक्रममै जोड दिइएको उनको भनाइ छ । कृषि क्षेत्रको आधुनिकीकरण, विविधिकरण र व्यवसायीकरण गर्ने पालिकाको नीति रहेको उनले सुनाए । कृषकलाई मल, बीउ, कृषि सामाग्री, सिंचाइँ मिटर वितरण लगायतका कार्यक्रम भइरहेको उनको भनाइ छ ।
Discussion about this post