बाँके जेठ २८ गते ।
बाँकेको राप्ती सोनारी गाउँपालिकाको न्यायिक समिति र न्यायिक समितिको गतिविधिको विषयमा छलफल र अनुगमन गरिएको छ । जिल्ला अदालत नेपालगन्जका न्यायधिश राजाराम पौडेल नेतृत्वको टोलिले गाउँपालिकामा छलफल तथा अनुगमन गरेको हो ।
जिल्ला अदालतलका श्रेष्ठदार गोविन्द आचार्य, शाखा अधिकृत सुरेश मल्ल, न्यायिक समितिका संयोजक तथा पालिकाका उपाध्यक्ष मनिषा सिंह थारु, प्रशासकीय अधिकृत दानबहादुर एडीको छलफलमा उपस्थिति रहेको थियो । न्यायिक समितिका संयोजक मनिषा सिंह थारुले न्यायिक समितिले सम्पादन गरेका विभिन्न मुद्दाहरुको र प्रक्रियाको विषयमा जानकारी दिइन् ।
आगामी दिनहरुमा मेलमिलापको माध्यमबाट मुद्दाहरुको किनारा गर्न र हरेक मुद्दाहरुको अभिलेख चुस्त राख्न न्यायमा पहुँच अभिवृद्धि गर्न समितिले जोड दिने बताइन् । उनका अनुसार मेलमिलापकर्ताहरुलाई तालिम समेत दिने गरिएको छ । त्यसक्रममा न्यायधिश पौडेलले समितिले गरेका कामहरुप्रति खुसी व्यक्त गरे । उनले न्यायिक समिति पनि अदालतकै एक अंशका रुपमा रहेको भन्दै न्याय सम्पादनमा प्रभावकारी भूमिका निर्वाह गर्न निर्देशन दिए । उनले सबैलाई न्याय हुने गरी मेलमिलापको नीति अवलम्वन गर्न पनि सुझाए ।
राप्ती सोनारी गाउँपालिकाको न्यायिक समितिमा चालु आवको हालसम्ममा कूल २९ वटा उजुरी दर्ता भएका छन् । कानुन शाखा प्रमुख लोकेन्द्र चन्दले साउनदेखि हालसम्म २९ वटा उजुरी आएको बताए । ती मध्ये १९ वटा फस्र्यौट भएका छन् । न्यायिक समितिमा आएका उजुरीमध्ये पाँचवटा मुद्दा मिलापत्र भएका छन् ।
१४ वटा न्यायिक समितिबाट हल भएका छन् । सो गाउँपालिकामा न्यायिक समितिमा आएकामध्ये सबैभन्दा धेरै सात उजुरी लेनदेनका रहेको चन्दले बताए । जग्गा विवाद बाटोघाटो, घरायसी झै–झगडा, कुलोपानी, खेतीपाती नोक्सानी लगायतका मुद्दा रहेको न्यायिक समितिले जनाएको छ । गाउँपालिकामा गत आर्थिक वर्षमा न्यायिक समितिमा २८ उजूरी दर्ता भएका थिए । आएका उजूरीलाई मेलमिलापको नीति अपनाएर मिलाउने गरिएको संयोजक थारुले जानकारी दिइन् । ७ वटा उजुरी भने दरपिट गरिएको छ ।
Discussion about this post