बाँके जेठ ३२ गते ।
बढ्दो गर्मीका कारण नेपालगन्जको जनजीवन प्रभावित भएको छ । विगत एक महिनादेखि नेपालगन्जको तापक्रप ४० डिग्री माथि छ । नेपालगन्जमा पछिल्ला सातादेखि तापक्रम अझ ४४ डिग्रीको आसपासमा छ ।
तापक्रम बढ्दै जानु र दिउँसोको समयमा चल्ने ताता हावाका कारण मानिसको जनजीवन थप कष्टकर बनेको छ । आगो झै पोल्ने तापक्रमले दिउँसोको समयमा मानिसहरुलाई घर बाहिर निस्कनै मुश्किल छ । रातीको समयमा पनि सुत्नै सकस छ । घरमा एसी जडान नगरेका नागरिकहरु राती घरमाथिको खुला छतमा सुत्ने गरेका छन् ।
यस्तो गर्मीका महसुस त कहिल्यै भएको थिएन् नेपालगन्जबासी भन्छन् दिनरात कटाउनै मुश्किल छ । त्यसैमा अनियमित विद्युतका कारण नागरिकहरुले थप सास्ती खेप्नु परेको छ । मनसुन पूर्वी नेपालबाट भित्रिसकेपनि पश्चिम तिर अझै फैलिएको छैन । पश्चिम तिर फैलिन केही दिन अझै लाग्ने भएकाले नेपालगन्जबासीले गर्मीको मार अझै केही दिन खेप्नुपर्ने अवस्था छ ।
बाँकेका स्थानीय तहले गर्मीकै कारण केही दिन विद्यालय बन्द समेत गरेका थिए । तर गर्मी कम हुने अवस्था नदेखिएपछि स्थानीय तहहरुले विहानी प्रहरमा विद्यालय संचालन गरेका छन् । अत्यधिक गर्मीका कारण मानवीय जनजीवन प्रभावित मात्र भएको छैन खेतिपाती नै प्रभावित भएको छ ।
धानको ब्याड राख्न किसानले पाएका छैनन् । ब्याड राखेको खेत पनि ध्वँजा फाँटेको छ । तरकारी खेती प्रभावित भएको छ । तरकारीका बोटहरु सुक्न थालेका छन् । त्यसैगरी मकैका बोटहरु पनि सुक्न थालेका छन् । अत्यधिक गर्मीका कारण विरामीहरु पनि बढेका छन् ।गर्मीजन्य रोगका बिरामीहरु अस्पतालमा बढेको चिकित्सकहरु बताउँछन् ।
Discussion about this post