बाँके साउन ९ गते ।
पछिल्लो समय जमुनाह नाका सुनसान जस्तै छ । जमुनाह नाकाभन्दा साईगाउँ नाका तस्करी गर्न सहज भएपछि अधिकांश तस्कर त्यता लागेका हुन् ।
प्रहरी चौकी साईगाउँका इन्चार्ज फेरिएसँगै तस्करी बढेको सर्वसाधारण बताउँछन् । तस्करहरुले उक्त नाकाबाट खुलेआम अवैध सामान भित्र्याइरहेको एक स्थानीयले जानकारी दिए । उनले भने, ‘प्रहरी चौकी साईगाउँको प्रहरी इन्चार्ज फेरिएसँगै तस्करी मौलाएको छ । प्रहरीको अगाडीबाट तस्करीको सामान लैजाँदा समेत प्रहरीले नदेखेको बहाना गर्छ । यो त अति भएन र ?’
साईगाउँ नाकाबाट तस्करी गराउन प्रहरी चौकी साईगाउँका इन्चार्जलाई जिल्ला प्रहरी कार्यालयबाट खटिएका सादा पोशाकका प्रहरी (घुमुवा प्रहरी) ले समेत साथ दिइरहेका छन् । अनलाइन खोजखवरलाई प्राप्त सूचना र भिडियो फुटेजका अनुसार घुमुवा प्रहरीका इन्चार्ज अतिश खानले उक्त नाकाका इन्चार्जसँग मिलेर तस्करलाई सघाई रहेका छन् ।
तर, खान नेपालगन्ज उपमहानगरपालिका २१ विर्ताका अरबी खाँको हत्याको अनुसन्धानका लागि परिचालित भएका घुमुवा प्रहरी हुन् । उनी र उनको समुह बिर्ताको घटना अनुसन्धानभन्दा नाकामा रहेका प्रहरी चौकीका इन्चार्जहरुसँग मिलेर तस्करलाई सघाउँदै आएका छन् । उनी र उनको समुह बिर्तामा भन्दा जमुनाह, साईगाउँ, हिरमिनिया, बेलभार लगायत नाकामा भेटिन्छन् । ‘तस्करी नियन्त्रणका लागि खटिएका प्रहरीले नै तस्करी गराउनु दुर्भाग्य मान्नुपर्छ,’ एक स्थानीयले नाम नबताउने शर्तमा भने ।
अधिकांश तस्कर साईगाउँ केन्द्रित भएपछि शंका उब्जिएको छ । सशस्त्र प्रहरीको समेत सहयोग पाएपछि पहिले जमुनाह नाकाबाट तस्करी गराउँदै आएका तस्कर पछिल्लो समय साईगाउँ केन्द्रित भएको जानकार बताउँछन् । बेलुकीको समयमा साईगाउँ नाकाबाट साइकल र मोटरसाइकलमा अवैध सामान ओसारेको प्रत्यक्ष देखिन्छ ।
स्थानीयले खुलेआम तस्करी भइरहेको गुनासो गरेपछि अनलाइन खोजखवरको टोली त्यहाँ पुग्दा अवैध सामान बोकेका साइकल र मोटरसाइकलको लामो लाइन फेला पारि भिडियो खिचेको थियो । उक्त भिडियो यसअघि प्रकाशन भइसकेको छ । ‘नेपाल प्रहरी एक्लैले तस्करी गराउन सक्दैन । यसमा सशस्त्र प्रहरीले पनि लाइन दिएको छ,’ अर्का एक स्थानीयले अनलाइन खोजखवरसँग भने ।
पहिले जमुनाह नाकाबाट तस्करी गर्दै आएका मोनु, सोनु, नसरुद्दिन राई, जाविर राई, कातिया, संजय लोध, अकबर अलि कबडिया, सकिल कबडिया, विजय वर्मा, रोशन जयसवाल, राजकुमार लोध, हासिम हल्वाई, सुलेमान, राना लगायतले साईगाउँ नाका रोजेका छन् ।
तस्करका यी नाइकेहरुले खुलेआम तस्करी गराउँदासमेत नेपाल प्रहरी र सशस्त्र प्रहरी मौन बस्नुले यी दुवै प्रहरीको हात छ भन्ने पुष्टि गरेको छ । यी तस्करका नाइकेहरुलाई सशस्त्र प्रहरी बिओपी बढैयाबाट खटिएको घुमुवा हिक्मत थापाले समेत सघाउँदै आएको खुलासा भएको छ ।
Discussion about this post