बाँके साउन २५ गते ।
स्वास्थ्य मन्त्री प्रदीप पौडेल आज शुक्रबार बाँके आउने भएका छन् । स्वास्थ्य मन्त्रीको जिम्मेवारी पाएपछि पौडेल पहिलो पटक बाँके आउन लागेका हुन् । पौडेल आज दिनभरी बाँकेमा व्यस्त रहने कार्यतालिका छ ।
विहान १०ः२५ बजे बुद्ध एयरमार्फत उनी राझा विमानस्थल आउने छन् । त्यहाँबाट सिधै उनी भेरी अस्पताल पुग्ने छन् । स्वास्थ्य सचिव डा.रोशन पोख्रेल सहित आउन लागेका मन्त्री पौडेलले भेरी अस्पतालको नयाँ इन्डोर भवनको औपचारिक उद्घाटन गर्नेछन् । त्यसपछि एमआरआइ सेवाको समेत औपचारिक उद्घाटन गर्ने कार्यतालिक रहेको अस्पताल विकास समितिका अध्यक्ष वीरेन्द्र बहादुर शाहले जानकारी दिए । अस्पतालले एक वर्ष अघिनै एमआरआइ सेवा सुरु गरिसकेको छ ।
तर औपचारिक उद्घाटन भने भएको थिएन् । भेरी अस्पतालले एमआरआइ सेवा सुरु गरेपनि प्रभावकारी भने हुन सकेको छैन । त्यसपछि उनले अस्पतालको अवलोकन गर्नेछन् । भेरी अस्पतालको कार्यक्रमपछि उनी पार्टी कार्यालयमा जाने छन् । दिउँसो एक बजे नेपाली काँग्रेस बाँकेको कार्यालयमा कार्यकर्ता भेटघाट कार्यक्रमको आयोजना गरिएको पार्टी सभापति नारायण प्रसाद गौडेलले जानकारी दिए ।
पार्टी भेटघाट कार्यक्रमपछि उनी कोहलपुर नगरपालिकाले आयोजना गरेको स्वास्थ्य बीमा कार्यक्रम उद्घाटनका लागि कोहलपुर जानेछन् । कोहलपुर नगर अस्पतालमा स्वास्थ्य वीमा कार्यक्रमको दिउँसो २ः३० बजे मन्त्री पौडेलले उद्घाटन गर्ने कार्यक्रम रहेको छ ।त्यसपछि मन्त्री पौडेल सुशील कोइराला क्यान्सर अस्पताल खजुराको समेत अवलोकन गर्ने तयारीमा छन् । दिनभरी यिनै कार्यक्रममा व्यस्त हुने मन्त्री पौडेल आज बेलुका नै काठमाडौं फर्किने छन् ।
Discussion about this post