बाँके साउन २५ गते ।
नेपालगन्ज उपमहानगरपालिका–२१, विर्ताका २२ वर्षीय अरबी खाँको हत्या भएको ५ महिना पुगेको छ । बाँके प्रहरीले हत्यामा संलग्नको पहिचान भइसकेको भन्दै परिवारजनलाई आश्वासन दिए पनि अहिलेसम्म पक्राउ गर्न सकेको छैन ।
खाँको गत चैत १८ गते विभत्स तरिकाले हत्या गरिएको थियो । तर, प्रहरीले आश्वासन दिए पनि खाँ परिवारलाई प्रहरीको कार्य प्रति चित्त बुझेको छैन । प्रमाण र किटानी जाहेरी दिँदासमेत प्रहरीले पक्राउ नगरेको अरबी खाँकी आमा राविया खाँले बताइन् । उनले हत्यारा र प्रहरीको साँठगाठ गरेको दावी गरिन् । ‘हत्यारासँग प्रहरीले पैँसा खाएर पक्राउ गर्न आनाकानी गरिरहेको छ,’ उनले भनिन्, ।
उनीहरुले मेराज खाँको संलग्नता भएको दावी गर्दै आएका छन् । मेराजले लगाउने लुगा रगतले लत्पतिएको अवस्थामा घटनास्थल नजिक फेला परे पनि प्रहरीले उनलाई उन्मुक्ति दिने खोजेको रावियाले बताइन् । ‘हामीले एउटालाई भन्छौँ । प्रहरीले अरुलाई समातेर लैजान्छ । केरकार गरेर छोड्छ,’ उनले भनिन्, ‘घुस खाएर प्रहरीले अनुसन्धानलाई फितलो बनाएको छ ।
हामीले भनेको ब्यक्तिलाई समातेर मुद्धा चलाउनु पर्छ ।’ सबुत प्रमाण हुँदाहुँदै प्रहरीले हत्यारालाई उन्मुक्ति दिन खोजेको भन्दै अरबी खाँका काका अब्दुल रहमानले आक्रोश पोखे । उनले अनुसन्धानको नाममा प्रहरीले आफूहरुलाई धेरै दुख दिएको बताए । ‘प्रहरी र हत्यारा वीच मिलोमतो छ । प्रहरीले पैँसा नखाएको भए किन मेराज खाँलाई पक्राउ गरि मुद्धा चलाउँदैन ?,’ उनले भने, ‘पाँच महिनासम्म हत्यारा पत्ता लगाउन नसक्ने विडम्बना बाहेक अरु हुन सक्दैन ।’
अरबी खाँकी काकीले पनि पैँसा खाएर प्रहरीले अनुसन्धान फितलो बनाएको भन्दै आक्रोश पोखिन् । उनले पनि हत्यारा समुहसँग प्रहरीले पैँसा खाएर अनुसन्धान फितलो बनाएको आरोप लगाइन् । बाँके प्रहरीले उक्त घटनाको अनुसन्धान गर्न प्रहरी हवल्दार अतिस खान, प्रहरी सहायक हवल्दार रामसुमन चौधरी, प्रहरी सहायक हवल्दार गंगाराम मल्ल, प्रहरी जवान बिनोद केसी र प्रहरी जवान वीरबहादुर ताउलेलाई परिचालन गरेको छ । तर, अनुसन्धानका लागि खटिएका सादा पोशाकका प्रहरीहरु विर्तामा आउन छाडेको अब्दुल रहमानले बताए । उनले भने, ‘कहिले काँही आउँछन् । तै पनि हामी र गाउँलेसँग केहि कुरा नसोधेर फर्किन्छन् ।’
बाँकेका डिएसपी नारायण डाँगीले भने पीडितहरुसँग प्रत्यक्ष सम्पर्कमै रहेको र अनुसन्धान भइरहेको दावी गरे । अनलाइन खोजखवरसँग उनले अनुसन्धान निष्कर्ष पुग्नै लागेकाले हत्यारा पक्राउ पर्ने बताए । उनले शंकास्पद व्यक्तीहरु फरार रहेकाले खोजी कार्य भइरहेको पनि बताए ।
लुम्विनी प्रदेशका डिआइजी कुवेर कडायतले पनि विर्ता घटनामा प्रहरी ठोस प्रमाण संकलनमै रहेको बताएका छन् । ‘कहिले काँही शंकाकै भरमा व्यक्ति पक्राउ पर्दा त्यसले मुद्दा थप कमजोर हुन्छ अनलाइन खोजखवरलाई उनले भने–‘त्यसैले ठोस प्रमाण भेटियो भने दोषी उम्कन पाउँदैन ।’
यो पनि पढ्नुहोस्
अरबी खाँको हत्यारा अझैँ पत्ता लागेनन्, सिआइवी गुहार्दै बाँके प्रहरी
यो पनि पढ्नुहोस्
अरबी खाँको आमा र श्रीमतिको अझैँ रोकिएन आँशु, कुरा गर्दागर्दै बेहोस हुन्छिन् श्रीमति साहिबा
यो पनि पढ्नुहोस्
भिडियो पनि हेर्नुस्
Discussion about this post