बाँके साउन ३१ गते ।
बाँकेको खजुरा गाउँपालिका– २ गौघाटस्थित राष्ट्रिय पशु प्रजनन कार्यालयले गत आर्थिक वर्ष २०८०÷८१ मा राँगा, साँढे र बोकाको गरी एक लाख २० हजार २ सय ४५ डोज वीर्य उत्पादन गरेको छ ।
राष्ट्रिय पशु प्रजनन कार्यालय नेपालगन्ज गौघाटका कार्यालय प्रमुख वरिष्ठ पशु विकास अधिकृत डाक्टर खगेन्द्रराज सापकोटाका अनुसार नेपालगन्ज मुर्रा राँगाबाट ७१ हजार ६ सय ५० डोज , भारतीय मुर्रा राँगाबाट दुई हजार ६ सय ४३ डोज , गड्डी राँगाबाट एक हजार ७४ डोज गरी ७५ हजार ३ सय ६७ डोज राँगाको वीर्य उत्पादन भएको छ ।
त्यस्तै जर्सी साँढेबाट पाँच हजार १९ डोज र होलिष्टेन साँढेबाट २२ हजार ९ सय २५ डोज अनि बोयर बोकाबाट १६ हजार ९ सय ३४ डोज वीर्य उत्पादन भएको छ । त्यसैगरी गत आवमा कार्यालयबाट ७० हजार ७० डोज वीर्य वितरण गरिएको छ । भारतीय मुर्रा राँगाको वीर्य भने अझै वितरण गरिएको छैन। कार्यालयमा गत वर्ष भारत सरकारले नेपाललाई अनुदानमा दिएका तीन वटा उन्नत जातका मुर्रा राँगा रहेका छन् ।
गत मङ्गसिर ६ गते नेपालगन्ज ल्याइएका ती राँगा ७ गते राष्ट्रिय पशु प्रजनन कार्यालय गौघाट ल्याइएका थिए । तीनमध्ये दुईवटा राँगाबाट वीर्य सङ्कलन गरिए पनि परीक्षणकै क्रममा रहेको हुँदा अझ वितरण नगरिएको कार्यालयका पशु सेवा प्राविधिक देवनारायण जैसी बताए । उनका अनुसार गत वर्ष ल्याइएका तीनवटा भारतीय राँगामध्ये दुईवटा राँगाबाट उत्पादन गरिएको दुई हजार ६ सय ४३ डोज वीर्य परीक्षणकै क्रममा रहेको छ । परीक्षणको सकारात्मक नतिजा आएपछि तत्काल भारतीय राँगाको वीर्य वितरण गरिनेछ ।
Discussion about this post