बाँकेको राप्तीसोनारीमा रातो सर्प भेटियो

बाँके साउन ३२ गते ।
बाँके राष्ट्रिय निकुञ्जको टोलीले जिल्लाको राप्तीसोनारी गाउँपालिका–८ स्थित एक विद्यालयबाट नेपालमा कमै मात्रामा पाइने रातो सर्पको उद्धार गरेको छ ।

राप्तीसोनारी गाउँपालिका–८ पेरानीस्थित एक विद्यालयको कक्षा कोठाबाट कमै मात्रामा पाइने कोरल रेड कुक्री प्रजातिको सर्पलाई उद्धार गरिएको निकुञ्जका रेन्जर यामबहादुर रावतले जानकारी दिए ।

उनका अनुसार यो प्रजातिको सर्प भारत र नेपालका केही स्थानहरूमा मात्र पाइने गरेको छ । दुर्लभ नै नभए पनि अत्यन्त कम मात्रामा पाइने यो सर्प विशेष गरेर नरम माटोभित्र लुकेर बस्ने गरेको पाइएको रावतले बताए । रेन्जर रावतका अनुसार नेपालमा चितवन राष्ट्रिय निकुञ्ज, शुक्लाफाँटा राष्ट्रिय निकुञ्ज, बर्दिया राष्ट्रिय निकुञ्जमा यसअघि यो प्रजातिको सर्प पाइएको थियो । बाँकेमा पनि दुई वर्षअघि निकुञ्जकै कम्पाउन्डभित्र पाइएको थियो ।

अन्य सर्पभन्दा कमै मात्रामा पाइने यो सर्प मन्द विषालु भएको उनले बताए । झट्ट हेर्दा यो सर्पको टाउकोबाट स्पष्ट घाँटी छुट्टिएको देखिँदैन । त्यसैगरी आजै राप्तीसोनारी–८ ओभरीबाट एउटा गोमन सर्पसमेत उद्धार गरिएको रेन्जर रावतले बताए । “ओभरीका एक स्थानीयको गोठमा छिरेर एउटा बोकालाई डसेर मारेको रहेछ, स्थानीयले हामीलाई खबर गरे, हामी तत्काल पुग्यौँ ।” रावतले भने, “दुई थोप्ले गोमन सर्प रहेछ, यो विषालु प्रजातिको सर्प हो, सर्पलाई उद्धार गरेर कार्यालयमा ल्याएका छौँ ।”