बाँके भदौ २८ गते ।
कोहलपुर नगरपालिका र अष्ट्रेलिया मेरिबिकी काउन्सिल बीच भगिनी सम्वन्ध विस्तारका लागि पहल सुरु भएको छ । कोहलपुर नगरपालिका र मेरिबिकीका सामाजिक अभियान्ताबीच शुक्रबार कोहलपुरमा प्रारम्भिक छलफल भएको छ ।
मेरिबिकीका सामाजिक अभियान्ता तथा उद्यमी हम्जा वारियोको नेतृत्वमा आएको तीन सदस्यीय टोलिले कोहलपुरका जनप्रतिनिधि र सामाजिक संघसंस्थाहरुसँग छलफल गर्दै हम्जाले कोहलपुर नगरपालिकासँग भगिनी सम्वन्ध विस्तारका लागि आफुले समन्वयकारी भूमिका निर्वाह गर्ने बताए ।
उनले यहाँको स्थानीय कला संस्कृति, शिक्षाको विकासलगायतका सवालमा सहयोग आदानप्रदान गर्न सकिने सम्भावना औल्याए । उनले कोहलपुर नगरपालिकाका नगर प्रमुख पूर्ण प्रसाद आचार्य नेतृत्वको टिमसँग सहकार्य गरेर अघि बढ्न सकिने उल्लेख गरे । सम्भावना बोकेका सहरहरुबीचका स्थानीय सरकारबीच समन्वय र सहकार्य सम्भव रहेको उनले सुनाए । कोहलपुर नगरपालिकाका नगर प्रमुख आचार्यले दुई देशबीचको भगिनी सम्वन्ध विस्तारका लागि कोहलपुर नगरपालिका उत्साहित रहेको बताए ।
उनले भगिनी सम्वन्ध विस्तारको प्रारम्भिक चरण सुरु भएको उल्लेख गर्दै कोहलपुर नगरपालिकाका लागि नयाँ भएपनि यो अभ्यास महानगरपालिकाहरुमा सुरु भइसकेको बताए । उनले कोहलपुर नगरपालिकाले शिक्षा, स्वास्थ्य, कृषि, भौतिक पूर्वाधार, पर्यापर्यटन र कलासंस्कृतिको संरक्षण, सम्वर्धन र प्रवर्धनका लागि प्राथमिकताका साथ काम गरिरहेको उल्लेख गरे । उनले त्यसका निमित्त सहकार्यका लागि भूमिका निर्वाह गरिदिन आग्रह गरे ।
नगर प्रमुख आचार्यको अध्यक्षतामा भएको कार्यक्रममा नगर उपप्रमुख संगिता सुवेदी, प्रमुख प्रशासकीय अधिकृत धोलकराज ढकाल, कोहलपुर नगर शिक्षा शाखा प्रमुख रामबहादुर हमाल, अन्तराष्ट्रिय सम्पर्क अधिकृत तथा सामाजिक अभियान्ता दान घिसिङ, सामाजिक अभियान्ता गीता शाही लगायतले आआफ्नो धारणा राखेका थिए ।
कार्यक्रममा कोहलपुर नगरपालिकाका वडाअध्यक्षहरु, कार्यपालिका सदस्यहरु, विभिन्न समितिका संयोजकहरु, जनप्रतिनिधिहरु, विभिन्न शाखा प्रमुख, कोहलपुर उद्योग बाणिज्य संघ, कोहलपुर व्यापार संघ, होटल व्यवसायी संघ, घरेलु महासंघ, कोहलपुर कृषि बजार, लायन्स, जेसिस, बालक्लव, किशोरी क्लव, युवा संजाललगायतको सहभागिता रहेको थियो
Discussion about this post