बाँके भदौ ९ गते ।
नेपाल प्रहरीका सहायक हवल्दार कलिम वेहना नेतृत्वको प्रहरी टोलीले त्रास देखाएर भारतीय नागरिकको तीन लाख रुपैयाँ लिएको आरोप लागेको छ । भारतबाट नेपालगन्ज आउँदै गरेका भारतीय नागरिक अब्दुल वाहिदबाट प्रहरी सहायक हवल्दार वेहनाको टोलीले डर, त्रास देखाएर तीन लाख रुपैयाँ लिएको पीडित वाहिदको आरोप छ ।
वाहिद ब्यापारी पृष्ठभूमिका व्यक्ति हुन् । उनले नेपालगन्ज र भारतीय क्षेत्रमा सुन लगायतको कारोवार गर्दै आएको बताइन्छ । प्रहरी सहायक हवल्दार वेहना जिल्ला प्रहरी कार्यालय दाङमा कार्यरत छन् । उनी नेपालगन्ज उपमहानगरपालिका १८ कारकाँदो निवासी हुन् । गत साउन २४ गते भारतीय नागरिक अव्दुल वाहिद आफ्नै गाडीमा नेपालगन्ज आइरहेका थिए ।
उनी ट्राफिक चोक नजिकै आएपछि प्रहरी सहायक हवल्दार वेहनासहित सादा पोसाकका प्रहरीले आफूलाई रोकेको वाहिदले बताए । ‘वेहनाले आफु प्रहरी भएको भन्दै आइडी कार्ड देखाए । मोटरसाइकलमा आएका वेहनाले गाडी रोक्न इशारा गरेपछि मैले गाडी रोकेँ,’ वाहिदले भने, ‘तपाईको गाडी खानतलासी गर्नुछ, साइड लगाउनुस् भने ।’
त्यसपछि वाहिदले वेहनाको निर्देशन अनुसार गाडी ट्राफिक चोकदेखि पूर्व तिरको सुनसान र खाली ठाउँतिर लगे । त्यहाँ पहिल्यै भारतीय प्लेटको युपि १६ एडी ६६८२ नम्वरको होण्डा सिटी कारमा केही व्यक्तिहरु रहेको उनले बताए ।
कारमा जयसपुरका व्यक्तिहरु भएको उनले बताए । बेहना र गाडीमा रहेका ब्यक्तिले वाहिदलाई गाडीबाट झर्न आदेश दिए । ‘म गाडीबाट झर्ने वित्तिकै उनीहरुले मेरो गाडी खानतलासी गरे । मलाई धक्कामुक्का गरे,’ वाहिदले भने, ‘बेहनाले अवैध सामान भित्र्याउन लागेको सूचना पाएको भन्दै मलाई मिल्न दवाव दिए ।’
नमिले जिल्ला प्रहरी कार्यालयमा लैजाने धम्कीसमेत दिएको उनले गुनसो गरे । ‘मैले केहि गल्ती गरेको छैन, बरु जिल्ला प्रहरी कार्यालयमा लैजानुस भने, तर उनीहरुले मानेनन्,’ उनले भने ।
सबै ठाउँतिर खानतलासी गरेर मसँग भएको तीन लाख रुपैयाँ वेहनाको टोलीले लगेको वाहिदले दावी गरेका छन् । ‘रकम लगेको कसैलाई नभन्नु, भनेमा नराम्रो हुने धम्कीसमेत वेहना र उनका साथीले दिए,’ उनले भने ।
कुनै सामान अथवा व्यक्ति पक्राउ परे जिल्लाको कमाण्डलाई जानकारी दिनुपर्ने हो । तर, वेहनाले आफुभन्दा माथिल्लो निकायलाई कुनै जानकारी नदिएको पाइएको छ ।
यो घटनामा प्रहरी हवल्दार वेहनाको कैफियत देखिएको छ । जिल्ला प्रहरी कार्यालय दाङमा कार्यरत वेहना बुवा बिरामी भएर नेपालगन्ज आएको बताउँदै आएका छन् । तर उनी बुवाको औषधि उपचार छाडेर असुली धन्दामा लागेका छन् ।
बाँकेमा रहेका जिल्ला प्रहरी कार्यालयका सादा पोसाकका प्रहरीलाई समेत आफु अनुकूल बनाएका वेहनाले उनीहरुसँगै असुलीमा सक्रिय छन् । वेहना यसअघि तत्कालिन डिआइजीको निर्देशनमा नेपालगन्जमा घुमुवा बसेका थिए ।
माथिल्लो तहका प्रहरी अधिकारीहरुसँग राम्रो सम्बन्ध बनाएका उनले जिल्लाका एसपीलाई समेत नटर्ने गरेको प्रहरी स्रोत बताउँछ ।
तर, वेहनाले भने आफुमाथि लागेको आरोपमा सत्यता नभएको दावी गर्छन् । उनले लुटिएका भनिएका व्यापारी वाहिदलाई आफुले नचिनेको प्रतिक्रिया दिए । बरु आफुलाई केही व्यक्तिले आफूलाई फसाउन खोजेको उनले आरोप लगाए । ‘पैँसा लुटिएको विषयमा मेरो नाम जोडेर बदनाम गर्न खोजिदैछ,’ उनले भने, ‘मेरो दिनचर्या बुवाको उपचारमा वितिरहेको छ । यसमा मेरो कुनै संलग्नता छैन ।’
Discussion about this post