बाँके भदौ १८ गते ।
चैत १७, २०८० मा नेपालगन्ज उपमहानगरपालिका २१ विर्ताका अरबी खाँको विभत्स तरिकाले हत्या भयो । बाँके प्रहरीले उक्त घटनामा संलग्न दोषी पत्ता लगाउन नसकेपछि प्रहरीको अपराध अनुसन्धान ब्यूरो (सिआइबी) लाई गुहार्यो । तर सिआइबीले समेत हत्यामा संलग्नलाई फेला पार्न नसकेर फर्कियो ।
त्यसकै अनुसन्धानका लागि बाँके प्रहरीले प्रहरी हवल्दार अतिस खाँको नेतृत्वमा अर्को अनुसन्धान टोली परिचालन गर्यो । सादा पोशाकमा परिचालन भएको यो टोलीले पनि कुनै लछारपाटो लगाउन सकेन ।
अनुसन्धानमा फेल भएपछि अतिस खाँको टोली अनुसन्धानलाई थाँती राखेर नाकामा आफ्नो ध्यान केन्द्रित गरेको छ । यो प्रहरी टोलीलाई सादा पोशाकमा रहेर शुक्ष्म तरिकाले अनुसन्धान गर्ने जिम्मेवारी बाँके प्रहरीले दिएको थियो । तर खाँ नेतृत्वको टोली आफूले पाएको अधिकार दुरुपयोग गरि तस्करसँग पैँसा उठाउन आफ्नो शक्ति लगाएको छ ।
सोही घटनाको अनुसन्धान गर्न जिल्ला प्रहरी कार्यालय दाङमा कार्यरत प्रहरी सहायक हवल्दार कलिम बेहनालाई प्रहरी हेडक्र्वाटरले पठाएको आफूलाई जानकारीमा आएको लुम्विनी प्रदेश प्रहरी प्रमुख डिआइजी कुवेर कडायतले अनलाईन खोजखवरसँग बताए । उनले अरबी खाँ हत्याको अनुसन्धान गर्न प्रहरी हवल्दार बेहनालाई अरबी खाँ हत्याको अनुसन्धान गर्न प्रहरी प्रधान कार्यालयले दाङलाई पत्र पठाएको हुनसक्ने बताए । ‘प्रहरी प्रधान कार्यालयले जिल्ला प्रहरी कार्यालय दाङलाई पत्र पठाएर अनुसन्धान गर्न पठाएको छ भन्ने सुनेको छु । लुम्विनी प्रदेश प्रहरीलाई यस विषयमा कुनै जानकारी छैन, प्रधान कार्यालय सिधै पठाएका प्रहरीको बारेमा प्रदेश कार्यालयलाई जानकारी हुँदैन,’ उनले भने, ‘उसले कुनै गलत काम गरेको प्रमाण दिनुस हामी कारवाही गछौँ ।’
उनलाई अनुसन्धानका लागि बाँके पठाइए पनि उनी अहिलेसम्म घटनास्थल र पीडित परिवारसँग भेट्घाट नगरेको पीडितले बताएका छन् । नेपालगन्ज आएदेखि बेहना पनि असुली धन्दामा लागेका छन् । उनले भारतीय सुन ब्यापारीलाई अपहरण शैलीमा नियन्त्रणमा लिएर तीन लाख रुपैयाँ लिएको पीडितले गुनासो गरे । ति ब्यापारीले टेलिफोनमा कुरा गर्दै भने, ‘भारतबाट नेपालगन्ज आउँदै थिएँ । ट्राफिक चोकमा रहेका बेहना र उनका साथीले गाडी रोकेर नियन्त्रणमा लिए ।
ट्राफिक चोकको पूर्वतर्फ एकान्त ठाउँमा लगेर गाडी चेकजाँच गरे । मसँग भएको तीन लाख रुपैयाँ खोसेर लगे । बाहिर कसैलाई भने फसाउने धम्की समेत दिए । मैले जिल्ला प्रहरी कार्यालय लैजान उनीहरुसँग भने, तर उनीहरुले जिल्ला प्रहरी कार्यालय गए झनै समस्या हुने भन्दै फिल्डमै कुरा मिलाउनु पर्ने भन्दै दवाव दिए ।’
यो घटनाको प्रमाण अनलाइन खोजखवरसँग सुरक्षित राखिएको छ । स्रोतले दिएको जानकारी अनुसार तीन लाख लुटिएको घटनामा घुमुवा प्रहरी हवल्दार अतिस खान र प्रहरी जवान वीरबहादुर ताउले समेतको संलग्नता रहेको स्रोतको दावी छ ।
२८ असार, २०८१ बेलुका नेपालगन्ज उपमहानगरपालिका ११ सदरलाइनमा ठेलामा व्यापार गरेर गुजारा गर्दै आएका ३८ वर्षीय इरसाद राईको धारिलो हतियार प्रहार गरेर हत्या भयो । स्कुटरमा आएका व्यक्तिले धारिलो हतियार प्रयोग गरेर उनको हत्या गरेर फरार भए । तर, अहिलेसम्म मुख्य हत्यारालाई प्रहरीले पक्राउ गर्न सकेको छैन । उक्त घटनाको अनुसन्धानमा पनि बाँके प्रहरी चुकेको छ ।
अनुसन्धानका लागि खटिएका सादा पोशाकका प्रहरीहरु आफ्नो जिम्मेवारीबाट पञ्छिदा अपराधिक घटनामा संलग्नहरु खुलेआम हिड्न पाएका छन् । यी हत्याका दुईवटा घटनामा संलग्नलाई प्रहरीले पक्राउ गर्न नसक्दा पीडित परिवार आफूलाई थप पीडा भएको गुनासो गरेका छन् । ‘अपराधि फेला नपर्दा पीडितमाथि झनै पीडा थपिएको छ ।
हत्यामा संलग्नहरु खुलेआम हिड्दा थप असुक्षित महसुस भएको छ,’ अरबी खाँकी आमा राविया खाँले भनिन्, ‘अनुसन्धानका लागि सादा पोशाकमा खटाइएका प्रहरी सम्बन्धित ठाउँमा नआएर नाकामा भेटिन्छन् । अव त हत्यारा पत्ता लाग्ला भन्ने आशा पनि मरिसकेको छ ।’
मृतक खाँका पिता करम खाँले घटनास्थलमा रगतले लत्पतिएको एउटा सर्ट फेला परेपनि सो सर्ट भएका व्यक्तिलाई प्रहरीले पक्राउ गरे पनि मुद्धा नचलाएर त्यसै छाडेको उनले गुनासो गरे । ‘हामीले हत्यारा त्यहि ब्यक्ति हो भनेर भन्दासमेत प्रहरीले कारवाही प्रक्रिया अगाडी नबढाउँदा प्रहरी माथि आशंका उब्जिएको छ,’ उनले भने ।
हत्यारा पत्ता नलाग्दा खाँ परिवार चैनसँग खान र सुत्न सकेको छैन । आमा राविया खाँ छोराको वियोगमा घरिघरि रुन्छिन् । ‘परिवारमा न त कोही राम्रोसँग खाना खान्छन् न त कोही काममा नै जान्छन् । निदाउन पनि सक्दैनौँ,’ उनले भनिन् ।
घरका मुखिया राईको हत्या भएसँगै उनकी पत्नी मुन्नी राईमाथि ठुलो संकट आइलागेको छ । पाँच सन्तानकी आमा मुन्नीले हत्यारा पक्राउ गर्न आन्दोलन समेत गरिन् । हत्यारालाई पक्राउ गरि कारवाहीको दायरामा ल्याउन उनले पटक–पटक बाँके प्रहरीलाई गुहारिन् । तर, प्रहरीले हत्यारा पक्राउ गर्न सकेको छैन । ‘हत्यामा संलग्नलाई पक्राउ नपर्दा शान्ति मिलेको छैन,’ उनले भनिन् ।
उता, प्रहरीले भने दुवै घटनाका हत्यारा पत्ता लगाउन कुनै पनि कसर बाँकी नराखेर काम गरिरहेको दावी गर्दै आएको छ । जिल्ला प्रहरी कार्यालय बाँकेले अरबी खाँको घटनामा सिआईबीले एक महिना लगाएर अनुसन्धान गरेको दावी गर्दै आएको छ ।
घटनास्थलको अनुसन्धान र अन्य विभिन्न अनुसन्धानबाट घटनाका संदिग्धको पहिचान भइसकेको बाँके प्रहरीले जनाएको छ । भारतमा समेत प्रहरी पठाएर खोजी भइरहेको बताउँदै बाँके प्रहरीले संदिग्ध पक्राउ परेपछि वास्तविक हत्यारा पत्ता लाग्ने स्पष्ट पारेको छ ।
यो पनि पढ्नुहोस्
नेपाल प्रहरीको नाममा घुमुवाको असुली धन्दा, भारतीय नागरिकसँग तीन लाख लुटेको आरोप
Discussion about this post