बाँके कातिक ९ गते ।
नेपालगञ्ज उपमहानगरपालिका(१६ स्थित आईसीपी निर्माणका लागि माटो बोक्ने टिप्परका कारण कालोपत्रे गरिएको चौलिका चौकदेखि डुडुवा(६ हुँदै वडा नं. १ सम्मको सडकखण्ड जीर्ण बनेको छ । २०७२ सालमा निर्माण कालोपत्रे गरिएको उक्त सडक ओभरलोड बोकेर गुड्ने टिप्परका कारण करीब ८ वर्षमै कालोपत्रे उम्किएर खाल्डाखुल्डीमा परिणत भएको हो ।
सडकमा परेका खाल्डाखुल्डीका कारण कालोपत्रे सडक भेट्नै मुस्किल पर्ने अवस्था भएको छ । खाल्डाखुल्डीसँगै बर्षातको समयमा पानी परेपछि नागरिकलाई जोखिमपूर्ण यात्रा गर्नुपर्ने बाध्यता छ । डुडुवा गाउँपालिका(६ का अध्यक्ष मोहनराम मिश्रले ठुला सवारीसाधन चले पनि खाल्डाखुल्डीका कारण साना साधन कार, मोटरसाइकल, अटोलगायतका साधनमा यात्रा गर्न समस्या हुने गरेको बताए ।
नेपालगञ्जको चौलिका चौकदेखि करिब ११ किलोमिटर सडक कालोपत्रे उप्किएकाले निर्माण व्यवसायीले सडक बनाउनुपर्ने स्थानीयले अडान लिएका थिए । त्यसका लागि पटक–पटक माटो बोकेको टिपर रोकेर डुडुवा ६ का स्थानीयले आन्दोलनसमेत गरेका थिए ।
तर बाँकेका तत्कालीन प्रमुख जिल्ला अधिकारी र बाँकेका तत्कालीन प्रहरी प्रमुखले आइसीपी निर्माण बाँकेकै गौरवको आयोजना भएकोले टिपर नरोक्न स्थानीयहरुसँग आग्रह गर्दै ठेकेदार कम्पनीले सडक मर्मत गरिदिने आश्वासन दिएका थिए । तर आइसीपी निर्माणको ठेक्का पाएको भारतीय कम्पनीका डाइरेक्टरले भत्किएको सडकको मर्मत गरिदिने मौखिक सम्झौता गरेको डुडुवा ६ का वडाध्यक्ष मिश्रले बताए ।
तत्काल कोभिडको बेला रहेकोले कोरोनाबाट उक्त कम्पनीका डाइरेक्टरको मृत्यु भएपछि अन्य कर्मचारीले वास्ता नगरेको वडाध्यक्ष मिश्रको भनाई छ । उक्त निर्माण कम्पनीको सेकेण्ड म्यानसँग कुरा गर्दा सो बारेमा आफुहरुलाई केही जानकारी नभएको बताएको वडाध्यक्ष मिश्रले जानकारी दिए ।
जीर्ण बनेको सडकका विषयमा पटक–पटक सम्बन्धित पक्षसँग छलफल भएपनि ओभरलोड बोक्ने टिप्पर नियन्त्रणमा कसैको ध्यान नपुगेको उनको भनाई छ । माटो, ढुङा ओभरलोड बोकेर टिपरहरु उक्त सडकमा दिनहुँ चलेको स्थानीयहरुको भनाई छ ।
अत्यधिक भारका गाडी गुडेकै कारण सडक बिग्रिएको, खाल्डाखुल्डीसँगै धुलाम्मे भएको भन्दै डुडुवा ६ का जनता आक्रोशित भएका छन् । समयमै सडक मर्मत नगरिए नेपालगञ्ज उपमहानगरसँग जोडिएको डुडुवा गाउँपालिकाको नयाँ बस्ती जोड्ने सडक खाल्डाखुल्डी भएका कारण दुर्गम हुने डुडुवा ६ का स्थानीय ओरीलाल मुराउको भनाई छ ।
Discussion about this post