बाँके कात्तिक १६ गते ।
तिहार र छठ पर्वलाई लक्षित गरि बाँके प्रहरीले सुरक्षा ब्यवस्था कडा पारेको छ । तिहारका बेला हुन सक्ने चोरी तथा लुटपातका घटना हुन नदिन मातहतका प्रहरीलाई परिचालन गरिएको बाँकेका प्रहरी प्रवक्ता डिएसपी आयुषप्रसाद जोशीले जानकारी दिए ।
उनले दसैँ, तिहार लक्षित सुरक्षा योजना अनुसार प्रहरी परिचालन गरिएको बताए । दसैँका बेला परिचालन भएका प्रहरी तिहारमा पनि परिचालन गरिएको बताए । ‘तिहारका बेला कुनै घटना हुन नदिन ठाउँ–ठाउँमा प्रहरी परिचालन गरिएको छ । सम्वेदनशिल क्षेत्रका पहिचान गरि पैदल र गाडीबाट मोवाइल गस्ती भइरहेको छ,’ उनले भने ।
धार्मिक सम्वेदनशिलतालाई मध्यनजर गरि बाँकेमा प्रहरी परिचालन गरिएको उनको भनाई छ । उनी भन्छन्, ‘घटना घटेको वा घट्न लागेको जानकारी पाएको १५ मिनेटमा सम्बन्धित ठाउँमा पुग्ने बन्दोवस्त मिलाइएको छ ।’
कहिँ घटना घटेको वा घट्न लागेको जानकारी गराउन आग्रह गर्दै उनले पैँसा नलाग्ने बाँके प्रहरीको १०० नम्बरमा फोन गरेर घटना विवरण टिपाउन सुझाव दिए । उनले भने, ‘घटनाको जानकारी पाउने वित्तिकै नजिकको प्रहरी वा पैँसा नलाग्ने १०० नम्बरमा फोन गरेर जानकारी दिनुस्, हामी तत्कालै घटनास्थल पुग्ने छौँ ।’
तिहार र छठलाई लक्षित गरि बाँकेका विभिन्न सडकमा समेत प्रहरी परिचालन गरिएको बताउँदै उनले मादक पदार्थ सेवन गरि सवारी साधन चलाउँदा हुने क्षति न्यूनिकरण गर्न ट्राफिक प्रहरी परिचालन गरिएको बताए । ‘नेपाल प्रहरी र ट्राफिक प्रहरीको संयुक्त टोलीले ठाउँ ठाउँमा छड्के जाँच गरिरहेका छन् । मादक पदार्थ सेवन गरि सवारी साधन चलाएको पाइए ठाउँका ठाउँ कारवाही गर्ने निर्देशन भएको छ,’ उनले भने ।
Discussion about this post