बाँके मंसिर ४ गते ।
बाँकेको राप्तीसोनारी गाउँपालिका किसान लक्षित कार्यक्रमलाई प्राथमिकता दिएर काम सुरु गरेको छ । किसानहरुलाई कृषि पेशामा व्यावसायिक गराउँदै उनीहरुलाई आत्मनिर्भर बनाउने गरी विउविजनमा अनुदान, विउविजनमा सहयोग, सिंचाइँ सुविधा तथा विउविजनमा तथा प्राविधिक सहयोग लगायतका कार्यक्रमलाई प्राथमिकता दिइएको गाउँपालिकाका अध्यक्ष तप्त बहादुर पौडेलले जानकारी दिए ।
आर्थिक वर्ष २०८१/०८२ मा कृषितर्फ १ करोड २ लाख ७५ हजार रुपैयाँ बजेट विनियोजन गरेको गाउँपालिकाले जैविक विषादी खरिद र तालिम, गहुँको वीउ वितरण लगायतका कार्यक्रमहरु सम्पन्न भइसकेको अध्यक्ष पौडेलले बताए । यसका लागि ६ लाख रुपैयाँ बजेट विनियोजन गरेको उनले बताए । वडा नं.१ देखि ९ सम्मका सबै वडामा २२५ जना किसानलाई तालिम प्रदान गरिएको राप्तीसोनारी कृषि शाखाका नायव प्राविधिक सहायक खड्क खत्रीले जानकारी दिए । विषादी खरिदको काम भने बाँकी रहेको उनले बताए । त्यसैगरी ९ वटै वडामा ५५४ क्विन्टल गहुँको वीउ वितरणको कार्य पनि सम्पन्न भइसकेको छ ।
वडा नं.१, २ र ३ मा पालिकाको बजेट र अन्य वडाहरुमा भने वडाहरुकै वजेटबाट गहुँको विउ वितरण गरिएको उनले बताए । त्यसैगरी कृषि बालि बीमाका लागि ४ लाख, बगर खेती कार्यक्रमका लागि ६ लाख, प्रांगारिक टोल विकास कार्यक्रमका लागि ५ लाख ९८ हजार, साझेदारी व्यावसायिक फलपूmल खेतीका लागि ३ लाख, सिंचाइँ सहित कृषि उत्पादन कार्यक्रमका लागि पनि ३ लाख बजेट विनियोजन गरिएको उनले बताए । त्यसैगरी धामपुर कृषि सेवा भवन संरक्षणका लागि २ करोड रुपैयाँ बजेट विनियोजन गरिएको पनि उनले बताए ।
बजार पूर्वाधार निर्माण, बाली कटान, मसाला बाली प्रवर्धन कार्यक्रम, महिलाहरुका लागि तरकारी उत्पादन प्रवर्धन तथा प्रोत्साहन कार्यक्रमलाई पनि पालिकाले समेटेको छ । चालू आर्थिक वर्षका लागि विभिन्न २८ वटा शीर्षकमा किसान लक्षित कार्यक्रम गर्न लागिएको गाउँपालिकाका उपाध्यक्ष मनिषा सिंह थारुले बताइन् । ‘राप्तीसोनारी गाउँपालिका कृषि क्षेत्रमा ठूलो सम्भावना भएको पालिका हो उनले भनिन्–‘स्वभाविक रुपमै किसानलाई लक्षित गरेर प्राथमिकता दिएर बजेट विनियोजन गरिएको हो ।’ गत वर्ष ८८ लाख ४२ हजार बजेट विनियोजन गरिएको थियो ।
मागमा आधारित व्यावसायिक कृषि विकास तथा प्रविधि र प्राविधिक सहयोग लगायतका कार्यक्रमहरु बनाएर कार्यान्वयन प्रारम्भ गरिन लागिएको उनले बताइन् । पालिका अध्यक्ष पौडेलले भने राप्तीसोनारी गाउँपालिका कृषिमा ठूलो सम्भावना भएको पालिका भएकाले कृषिलाई प्राथमिकता दिएको बताए । उनले कृषि र पशुपालनलाई प्राथमिकता दिएर बजेट विनियोजन गरेको उल्लेख गरे । चैते धान प्रवर्धन कार्यक्रम, खाद्यान्न बाली उन्नत वीउ उपयोगी अनुदान र कृषि यान्त्रिकीकरण कार्यक्रमका लागि संघीय सरकारले बजेट पठाएको नायव प्राविधिक सहायक खत्रीले बताए ।
उनले चैते धान प्रर्वधन कार्यक्रमका लागि १० लाख, खाद्यान्न बाली उन्नत बीउ उपयोगी कार्यक्रमका लागि १० लाख २५ हजार र कृषि यान्त्रिकीकरण कार्यक्रमका लागि ७ लाख रुपैयाँ बजेट प्राप्त भएको बताए । कृषि यान्त्रिकीकरण कार्यक्रम भने वडा नं. १ मा तय भएको छ । गत वर्ष सफलतापूर्वक सम्पन्न भएका र प्रभावकारी देखिएका बगर खेती कार्यक्रमलाई यो वर्ष निरन्तरता दिइएको उनले बताए । गत वर्ष वडा नं.५ मा वगर खेती प्रवर्धन कार्यक्रम गरिएको थियो । त्यसैगरी गत वर्ष नौ वटै वडामा माटो परीक्षण कार्यक्रम गरिएको थियो ।
Discussion about this post