बाँके मंसिर ४ गते ।
जिल्ला प्रहरी कार्यालय बाँकेले गत कात्तिक महिनामा मात्रै ४८ जना फरार प्रतिवादीलाई पक्राउ गरेको छ । १२ बर्ष ५ महिना २० दिन कैद र ५ लाख २० हजार १६८ रुपैयाँ जरिवाना असुल गर्न बाँकी रहेका ४८ जना फरार प्रतिवादीलाई लुकिछिपी बसेको अवस्थामा जिल्लाका विभिन्न स्थानबाट पक्राउ गरिएको जिल्ला प्रहरी बाँकेका प्रवक्ता एवं डीएसपी आयुष जोशीले जानकारी दिए ।
जिल्ला प्रहरी कार्यालय बाँकेले यो अवधिमा २० लाख ७५ हजार ६५० रुपैयाँ बराबरको भन्सार छ्लीका सामग्री बरामद गरेको छ । ती सामग्रीसहित एउटा कार समेत बरामद गरी आबश्यक कारबाहीका लागि सम्बन्धित निकायमा बुझाइसकेको प्रहरीले जनाएको छ । जिल्ला प्रहरी कार्यालय बाँकेमा दर्ता भएका ११८ वटा मुद्दामा २०३ जना ब्यक्तिहरुलाई पक्राउ गरी कानूनी दायरामा ल्याइएको छ भने ४० वटा पेण्डिङ मुद्दाहरु फछर्यौट गरिएको डीएसपी जोशीले बताए ।
त्यसैगरी ठाडो उजुरीतर्फ ४१५ वटा निवेदनमा ४ सय फछर्यौट भएको र बाँकी १५ निवेदन प्रक्रियामा रहेको बाँके प्रहरीले जनाएको छ । त्यस्तै महिला तथा बालबालिकातर्फका १० मुद्दा दर्ता भएकोमा ११ जनालाई पक्राउ गरी कारबाही प्रक्रिया अगाडि बढाएको बाँके प्रहरीले जनाएको छ भने घरेलु हिंसासम्बन्धि ४६ वटा उजुरीमा ३० वटा फछर्यौट भएको तथा बाँकी अनुसन्धान कारवाही प्रक्रियामा रहेका छन् । जिल्ला प्रहरी कार्यालय बाँकेले अवैध उत्खननतर्फ ३ वटा ट्याक्टर नियन्त्रणमा लिएर ३० हजार रुपैयाँ जरिवाना गराएर सम्बन्धित निकायमा पठाएको छ ।
यसैगरी जिल्लाका विभिन्न स्थानबाट हराएका दुई वटा मोटरसाइकल र १० थान स्मार्ट मोबाइल फेला पार्दै सम्बन्धित धनीलाई बुझाएको डीएसपी जोशीले जानकारी दिए । जिल्ला प्रहरी कार्यालय बाँकेले बेपत्ता तथा हराएको भन्दै खोजतलासका लागि दिइएको २३ निवेदनमा ९ जनालाई फेला पारेर आफन्तको जिम्मा लगाएको छ । बाँकी खोजतलासको क्रममा रहेको जनाएको छ । यस्तै ट्राफिक कारबाहीतर्फ कात्तिक महिनामा २७८२ सवारीसाधनलाई कारबाही गर्दै २४ लाख ३१ हजार रुपैयाँ रुपैयाँ राजश्व संकलन गरिएको जिल्ला प्रहरी कार्यालय बाँकेले जानकारी दिएको छ ।
प्रहरीले सोही अवधिभर २४ जना लागूऔषध कारोबारीलाई पक्राउ गर्दै लागूऔषध मुद्दा चलाएको छ भने सोही दौरानमा २८ ग्राम ५ सय मिलिग्राम ब्राउन सुगर, २०८ नाइट्राजेपाम ट्याब्लेट बरामद छ । त्यसैगरी सामुदायिक प्रहरी सहकार्यतर्फ जिल्लाभरमा बाँके प्रहरीले ४८ पटक सचेतनामूलक कार्यक्रम गरेको छ । जसमा ४ पटक लागूऔषध, आत्महत्यासम्वन्धि सचेतना ८ पटक, अल्पसंख्यकसंग प्रहरीतर्फ २ पटक, नागरिक सुनुवाईतर्फ २ पटक र चोरी सम्बन्धि ९ पटक सचेतना कार्यक्रम सञ्चालन गरिएको डीएसपी जोशीले जानकारी दिए ।
यस्तै ट्राफिक सचेतनातर्फ २२८ पटक सचेतनामूलक कार्यक्रम (लेन अनुशासन, जेब्रा क्रसिङ, ट्राफिक लाइट) सञ्चालन गरिएको थियो । जिल्ला प्रहरी बाँकेको आन्तरिक सुदृढीकरण प्रयास अन्तर्गत कात्तिक महिनामा इलाका प्रहरी कार्यालय बैजापुरलाई उत्कृष्ट प्रहरी इकाई घोषणा हुँदा आचरण बिपरीत कार्य गर्ने तीन जना प्रहरी कर्मचारीहरुलाई तीन पुस्तेमा जनिने गरी कारवाही गरिएको जिल्ला प्रहरी कार्यालय बाँकेले जनाएको छ ।
जिल्ला प्रहरी कार्यालय बाँकेले चाडपर्व लक्षित सुरक्षा योजना अन्तर्गत तालिम प्राप्त कुकुरहरुद्वारा नेपालगञ्ज बसपार्क, राँझा बिमानस्थल र जमुनाहा नाकामा समय–समयमा चेकजाँच गर्नुका साथै पैदल गस्ती गरेको डीएसपी जोशीले जानकारी दिए ।
Discussion about this post