बाँके मंसिर ८ गते ।
बाँकेको राप्तीसोनारी गाउँपालिका वडा नं.२ कचनापुरस्थित अशोक सामुदायिक वन उपभोक्ता समुहको भवनको शनिवार शिलान्यास गरिएको छ । उक्त सामुदायिक वनका उपभोक्ता समुहका संरक्षक समेत रहेका गाउँपालिकाका अध्यक्ष तप्तबहादुर पौडेलले भवनको शिलान्यास गरेका हुन् ।
तीन महिनाभित्रमा सक्ने गरी भवन शिलान्यास गरिएको समुहका अध्यक्ष भगत सिंह थारुले जानकारी दिए । २३ लाख ५० हजारको लागतमा चार कोठे पक्की भवन निर्माण गरिन लागिएको उनले बताए । ३९४ हेक्टर क्षेत्रफलमा फैलिएको यो सामुदायिक वन २०५७ साल असारमा स्थापना भएको हो । सामाजिक क्षेत्रमा समेत लगानी गर्दै आएको अशोक सामुदायिक वन उपभोक्ता समुहमा १५७ घरधुरी उपभोक्ता समावेश छन् ।
शिलान्यास कार्यक्रमलाई सम्वोधन गर्दै पालिका अध्यक्ष पौडेलले सामुदायिक वनहरुले समाज रुपान्तरणमा महत्वपूर्ण भूमिका निर्वाह गरेको बताए । उनले सामाजिक कार्यसँगै विकास निर्माणका काममा र आयआर्जनमा समेत पालिकाभित्र रहेका सामुदायिक वनहरुले लगानी गरेको भन्दै खुसी व्यक्त गरे । उनले भने–‘एकातिर वनजंगल संरक्षण हुँदा चरिचरणमा पनि फाइदा पुगेको छ भने अर्कोतर्फ मानिसहरुको जीविकोपार्जनमा समेत महत्वपूर्ण भूमिका निर्वाह गरेको छ ।’
अशोक सामुदायिक वनले बाटोघाटो निर्माण, विद्यालय तथा आपतविपत परेका मानिसहरुलाई आर्थिक सहयोग गर्दै आएको समुहका अध्यक्ष थारुले बताए । त्यसैगरी उपभोक्ताहरुको आर्थिक अवस्था सुधारका लागि आयआर्जनका काममा समेत सहयोग गरेको उनको भनाइ छ ।
Discussion about this post