बाँके मंसिर ९ गते ।
कोहलपुर नगरपालिकामा आइतवारदेखि मेलमिलापकर्ताहरुलाई पुनर्ताजगी तालिम सुरु भएको छ । कोहलपुर नगरपालिकाको आयोजनामा सुरु भएको तालिमको उद्घाटनमा न्यायिक समितिकी संयोजक समेत रहेकी नगर कार्यवाहक प्रमुख संगिता सुवेदीले मेलमिलापकर्ताहरुको दक्षता अभिवृद्धिका लागि तालिम आयोजना गरिएको बताइन् ।
उनले पन्ध्र वटै वडामा मेलामिलाप केन्द्र स्थापना गरिएको बताउँदै ती केन्द्रहरुले न्याय सम्पादनमा प्रभावकारी काम गरेको बताइन् । कोहलपुर नगरपालिकाको लिजामा समेत न्यायिक समितिको मुल्यांकन नतिजा उत्कृष्ट देखिएको भन्दै मेलमिलाकर्ताहरुले गरेको काम प्रभावकारी भएको बताइन् । प्रत्येक वडामा मेलमिलाप संयोजक तोकिएको छ भने एउटा वडामा तीन जना देखि १२ जना सम्म मेलमिलापकर्ता छन् ।
उनीहरुको क्षमता अभिवृद्धिका लागि विभिन्न चरणमा विज्ञहरुबाट तालिम दिने काम भइरहेको उनले बताइन् । पहिलो चरणमा मेलमिलापकर्ताहरुलाई ४८ घण्टे तालिम दिइएको पनि उनले स्मरण गराइन् । नयाँ नयाँ कानुन आइरहने र संशोधन भइरहेकाले मेलमिलापकर्ताहरु पनि एडभान्स हुन आवश्यक रहेकाले तालिमको आवश्यक वोध भएको उनले बताइन् ।
त्यसैगरी वडामा काम गर्दा आउन सक्ने चुनौति, समस्या र त्यसको सम्वोधनका लागि मेलमिलापकर्ताहरुले अपनाउनु पर्ने तवरतरिकाका बारेमा तालिममा सिकाइ हुने उनले बताइन् । गएको आर्थिक वर्षमा न्यायिक समितिले गरेका निर्णयहरु उपर पुनरावेदन नपरेकाले पनि न्यायिक समितिले न्याय निरुपणमा पारदर्शीता अपनाएको उनको भनाइ छ ।
यस्तै तालिम उद्घाटन कार्यक्रममा बोल्दै लुम्बिनी प्रदेशसभा सदस्य वसन्ती अधिकारीले मेलमिलापकर्ताहरुले समाज पढ्ने भएकाले उनीहरुले गर्ने न्याय सम्पादन अत्यन्तै उपयोगी हुने बताइन् । द्धन्द्धरत पक्षहरुलाई जीतजीतको वातावरण बनाएर परिवार तथा समाजमा शान्ति स्थापनाका निमित्त मेलमिलापकर्ताहरुले महत्वपूर्ण भूमिका निर्वाह गरेको उनले बताइन् ।
उनले समाज विकृत मानसिकताबाट गुज्रदै गएकाले समाजलाई काउन्सिल गर्न पनि जरुरी रहेको बताइन् । सोमवारसम्म चल्ने तालिममा नगरपालिकाका कानुनी सल्लाहकार कर्ण केसी र अधिवक्ता विकास आचार्यले सहजीकरण गर्नेछन् । वडा नं.१२ का वडा अध्यक्ष वीरेन्द्र कुमार शाहको स्वागत मन्तव्यबाट सुरु भएको कार्यक्रमको संचालन दोर्ण वोहराले गरेका थिए ।
Discussion about this post