सुर्खेत पुस ५ गते ।
राष्ट्रिय गौरवको आयोजना भेरी बबई डाइभर्सन बहुउद्धेश्यीय आयोजनाको सुरुङ निर्माण गरेसँगै सुरुङ आसपासका क्षेत्रमा पानीका मुहान सुकेका छन् । जसका कारण स्थानीयलाई पानीको संकट परेको छ । भेरी बबई डाइभर्सन बहुउद्धेश्यीय आयोजनाले सुर्खेतको चिप्लेबाट भेरी नदीको पानी बबईमा झार्न १२ किलोमिटर सुरुङ निर्माण गरेसँगै सुरुङ वरपरका मुहान सुकेका हुन् ।
चुरे पहाडभित्र १२ किलोमिटर लामो सुरुङ निर्माण गरिएसँगै वरपरको मुहान सुकेपछि ट्यांकरबाट पानी ओसारेर नदी आसपासका स्थानीयले तिर्खा मेटिरहेका छन् । सुरुङ निर्माण गर्दा चुरेका भित्री भुभागमा पानी वग्ने प्राकृतिक मार्गहरु काटिएका कारण धाराहरु सुक्दै गएका छन्् ।
धारामा आउनुपर्ने पानी अहिले सुरुङभित्रको टनेलमा वगिरहेको स्थानीयबासी समेत रहेका एमाले सुर्खेतका अध्यक्ष कुलमणी देवकोटाको भनाइ छ । भेरीगंगा नगरपालिका ११ मा पर्ने चुरेको गोठेर र भिमपुर क्षेत्रका वस्तीमा पानीका मुहान सुकेका छन् । जलस्रोत तथा सिंचाइँ विभागले ३३ अर्वको आयोजनामध्ये भेरी करिडोर आयोजनालाई ३ अर्व रुपैया दिएको छ ।
जसले आयोजना अन्तर्गत निर्माण कार्य गर्दा आइपर्ने प्रभाव र समस्या समाधानका लागि छुट्याएपनि खानेपानीको दीगो व्यवस्थान भने हुन सकेको छैन । तर लिफ्टबाट पानी पुर्याउने प्रयास भइरहेको भेरी बबई डाइभर्सन बहुउद्धेश्यीय आयोजनाका निर्देशक रनबहादुर बमले बताए ।
आयोजना प्रभावित क्षेत्रका बासिन्दालाई पिउनेको पानीको व्यवस्था गर्न आवश्यक छ ।त्यसो त स्थलगत अनुगमनमा पुगेको प्रतिनिधिसभा पूर्वाधार विकास समितिका सदस्यहरुले समेत पानीको संकट समाधानका लागि आयोजनालाई निर्देशन दिइसकेका छन् ।
Discussion about this post