बाँके पुस ६ गते ।
कृषि विभाग अन्तर्गतको कृषि सूचना तथा प्रशिक्षण केन्द्रले यसवर्ष हिउँदमा औषत भन्दा कम वर्षा हुने र तापक्रमपनि न्यून हुने भएकाले त्यसको असर हिउँदे वालीमा पर्ने प्रक्षेपण गरेको छ । केन्द्रको सूचना प्रणालीसँग जोडिएका देशभरका २५ हजार बढी किसानलाई एकैपटक एसएमएस पठाएर बाली जोगाउन सन्देश पनि पठाएको छ । तर किसानलाई भने बाली जोगाउने सीप र स्रोतसाधनका अभाव देखिएको छ ।
हिउँदे वर्षा नहुँदा बाँके कालावन्जारका किसान नरेन्द्र प्रजापतिले लगाएको आलुमा पाला लाग्न सुरु गरिसकेको छ । सरकारले वर्षा कम हुने भएकाले बाली जोगाउन मोवाइलमा एसएमएस पठाएर सचेत त बनायो तर पालाबाट जोगाउन न त सिंचाइँको व्यवस्था गर्न सक्यो न त विषादी सहयोग ।
त्यस्तै पीडा छ अर्का किसान उदयराज यादवको पनि । अधिकांश किसानले त कृषि सूचना तथा प्रशिक्षण केन्द्रको सन्देश समेत थाहा पाएका छैनन् । कृषि सूचना तथा प्रशिक्षण केन्द्रले एकैपटक देशभरका २५ हजार बढी किसानलाई मोवाइलमा एसएमएस पठाएर यो हिउँदमा सरदर भन्दा कम वर्षा हुनुको साथै अधिकतम र न्युनतम तापक्रम पनि सरदर भन्दा बढी हुने सम्भावना रहेकाले यसबाट हिउँदे वालीमा पर्न सक्ने जोखिम न्यूनीकरणका लागि सावधानी अपनाउन भनेको छ ।
कुलोपानी नलाग्ने र आकाशे पानीको भरमा खेती गर्ने किसान हिउँदको समयमा आइपर्ने मौसमी प्रतिकुलताबाट वाली जोगाउन सक्ने अवस्थामा छैनन् । तापक्रम घट्दा पर्न सक्ने तुषारो र शितलहरबाट हिउँदे वाली र तरकारी जोगाउन चाहिने साधनस्रोत किसानसँग छैन । प्रतिकुल मौसमबाट हिउँदे वाली संरक्षण गर्न नसक्ने अवस्थामा पुगेका किसानहरु यो वर्ष दोहोरो मारमा पर्ने भएका छन् ।
पाक्ने बेलाको मुख्य अन्नबाली धान र लगाउदा लगाउँदैको आलु वाली डुवानमा परेर ठूलो क्षती व्यहोरेका बाँके, बर्दिया सहित पश्चिम तराईका किसानहरु हिउँदे वाली पनि नसप्रिने कुराले चिन्तामा परेका छन् । सरकारले धान र आलु वाली डुवानमा परी भएको क्षतीपूर्ति समेत अहिलेसम्म नदिएपछि ऋणको भारमा थिचिएका किसानको निराशा थप बढेको छ ।
Discussion about this post