बाँके, भदौ ३१ गते ।
भारतबाट आयात हुने सागसब्जीमा भन्सारमा कडाइ भएपछि बाँकेका किसानले उत्पादन गरेको तरकारीले बजार पाउन थालेको छ। खेतबारीबाटै राम्रो मूल्यमा बिक्री हुन थालेपछि किसान व्यावसायिक तरकारी खेतीतर्फ आकर्षित भएका छन्।
डुडुवा गाउँपालिका–६ हिरमिनिया तथा नेपालगन्ज उपमहानगरपालिकाका भवानीयापुर, परसपुर, बसुदेवपुर, पुरैनीलगायत क्षेत्रमा किसानले तरकारी खेती बढाएका छन्।
नेपालगन्ज–२१ पुरैनीका सलाउद्दीन बागवानले खेतबारीबाटै तरकारी बिक्री हुन थालेपछि गाउँमा खेती गर्ने किसान बढेको बताए। ‘पहिले तरकारी बेच्न टाढाटाढा पुग्नुपथ्र्यो, अहिले खेतबाटै राम्रो मूल्यमा बिक्री हुन्छ,’ उनले भने।
रानीतलाउ कृषि उपज बजार सञ्चालक समितिका अध्यक्ष मोतिसरा थापा क्षेत्रीका अनुसार अहिले बजारमा बाँकेमै उत्पादन भएका तरकारीको आपूर्ति बढेको छ। भारतबाट तरकारी ल्याउँदा भन्सार तिर्नुपर्ने भएपछि आयात घटेकाले स्थानीय उत्पादनले बजार पाएको उनले बताइन्।
थोक व्यवसायी मोहियुद्दिन राईले भारतीय सस्तो तरकारीसँग प्रतिस्पर्धा गर्न नसकेका स्थानीय किसानले अहिले उत्पादनको राम्रो मूल्य पाउन थालेको बताए।
कृषि ज्ञान केन्द्र बाँकेका सूचना अधिकारी सुजिता शर्माका अनुसार बजार मूल्य राम्रो हुन थालेपछि निर्वाहमुखी खेती गर्दै आएका किसानसमेत व्यावसायिक तरकारी खेतीतर्फ लागेका छन्। बाँकेमा ६ हजार ३५२ हेक्टरमा वार्षिक १३ हजार मेट्रिक टनभन्दा बढी तरकारी उत्पादन हुने गरेको उनले बताइन्।
केन्द्रका अनुसार अहिले नेपालगन्ज बजारमा फूलगोभी, बन्दागोभी, लौका, फर्सी, काँक्रा, बोडी, गोलभेडा र खुर्सानीलगायत स्थानीय उत्पादनको आपूर्ति भइरहेको छ। केन्द्रले एक हजार ३५० किसानलाई विभिन्न हिउँदे तरकारीका बीउसमेत वितरण गरेको छ।
Discussion about this post