बाँके पुस १४ गते ।
बाँकेसहित आपसपासका जिल्लामा हिउँदे बालीको लागि आवश्यक पानी नपरेपछि किसानहरु चिन्तन भएका छन् । पुष महिनाको दोस्रो सातासम्म पनि पानी नपर्दा बालीको वृद्धि विकास नहुने चिन्ताले किसानहरु पिरोलिएका छन् । शनिवार मौसम बदली भएर केहीबेर मात्रै पानीको थोपा खसेपनि वर्षा भने भएन् ।
बाँकेको ग्रामीण भेगका किसानहरुले हिउँदे बालीअन्तर्गत गहुँ, तोरी, मुसुरो, तथा मकैलगायतका बाली लगाएका छन् । तर आवश्यकता अनुसार पानी नपर्न र हुस्सु समेत नलाग्दा बालीलाई नकारात्मक असर परेको किसानहरुले बताएका छन् । डुडुवा गाउँपालिका वडा नम्बर ६ का किसान गुरुदीन यादवले विगतका जाडो मौसममा हुस्सु लागेकै समयमा गहुँ बालीमा पहिलो सिचाई गरेको बताउँदै यसपाली चर्को घाम लागेका कारण बोरिङ मार्फत सिचाई गरेको बताए ।
हिउँद याममा अहिलेसम्म पानी नपर्दा बालीको वृद्धि विकास रोकिएको उनको भनाई छ । यस्तै नरैनापुर गाउँपालिकाका किसानहरुले हालसम्म पानी नपरेका कारणले तोरी, गहुँलगायत अन्य बालीमा समस्या भएको र यसले गर्दा उत्पादनमा कमी हुने बताए । हालसम्म पानी नपरेपछि किसानहरुले पटक पटक सिँचाई गरेर भएपनि बाली जोगाइरहेको उनहीहरुको भनाइ छ । हिउँद याममा आकाशे पानीको भरमा रहेका किसानहरूलाई पानी नपर्दा समस्या भएको किसानको गुनासो छ ।
हिउँदमा हुस्सु लागेन र पानी परेन भने हिउँदे बालीको उत्पादनमा २० प्रतिशत कमी हुने कृषि विज्ञहरु बताउँछन् । उत्पन्न समस्याका बारेमा डुडुवा गाउँपालिकाका कृषि शाखाका प्रमुख सुशील शर्माले हिउँदे बालीको अर्थ नै हिउँद अर्थात् शीतलहरमा हुने बाली रहेको बताए । हिउँदे बालीहरू चिसो र सिमसिमे पानीमा वृद्धि विकास तथा फस्टाउने गर्दछन् ।
यस पाली पानी नपरेका कारण बालीहरू खासै राम्रो नहुने प्रमुख शर्माको भनाई छ । अझै समय छ, पुस मसान्तसम्म पनि पानी पर्यो भने बाली सप्रिन सक्ने उनले बताए । यसै गरी डुडुवा गाउँपालिका वडा नं. ६ का केही किसानहरुसँग सिँचाईको सुविधा रहेकोले बोरिङबाट पानी चहारेर बाली जोगाउन थालेको डुडुवा ६ का वडाध्यक्ष मोहनराम मिश्रले जानकारी दिए । उनले भने,‘जुन किसानसँग सिँचाई सुविधा छैन त्यस्ता किसानले अरुसँग भाडामा लिएर पानी चहार्ने गरेका छन् ।’
Discussion about this post