बाँके माघ ८ गते ।
नेपालगन्ज उपमहानगरपालिका–२१, विर्ताका २२ वर्षीय अरबी खाँको हत्यामा संलग्नहरु पक्राउको माग गर्दै पीडित परिवारले मंगलवार नेपालगन्जमा विशाल प्रदर्शन गरेका छन् । खाँको गत चैत १८ गते विभत्स तरिकाले हत्या गरिएको थियो ।
हत्या भएको १० महिना वित्न लाग्दा समेत प्रहरीले संलग्नहरुलाई पक्राउ गर्न नसकेपछि पीडित परिवारहरु न्याय खोज्न सडकमा आएका हुन् । उनीहरुले नेपालगन्जको धम्वोजीमा टाएर बालेर प्रदर्शन गरे । पीडित परिवारले प्रहरी विरुद्ध नारावाजी समेत गरेका थिए । प्रमाण र किटानी जाहेरी दिँदासमेत प्रहरीले हत्यारालाई पक्राउ नगरेको अरबी खाँकी आमा राविया खाँले बताइन् ।
उनले हत्यारा र प्रहरीको साँठगाठ गरेको दावी गर्दै न्यायका लागि सडकमा आउनु परेको बताइन् । ‘हत्यारासँग प्रहरीले पैँसा खाएर पक्राउ गर्न आनाकानी गरिरहेको छ,’ उनले आक्रोसित हुँदै भनिन् । उनीहरुले मेराज खाँको संलग्नता भएको दावी गर्दै आएका छन् । मेराजले लगाउने लुगा रगतले लत्पतिएको अवस्थामा घटनास्थल नजिक फेला परे पनि प्रहरीले उनलाई उन्मुक्ति दिएको रावियाको भनाइ छ ।
‘हामीले एउटालाई भन्छौँ । प्रहरीले अरुलाई समातेर लैजान्छ । केरकार गरेर छोड्छ,’ उनले भनिन्, ‘घुस खाएर प्रहरीले अनुसन्धानलाई फितलो बनाएको छ । हामीले भनेको ब्यक्तिलाई समातेर मुद्धा चलाउनु पर्छ ।’ सबुत प्रमाण हुँदाहुँदै प्रहरीले हत्यारालाई उन्मुक्ति दिन खोजेको उनको आरोप छ ।
Discussion about this post