उच्च अदालतमा लक्ष्यभन्दा बढी मुद्दा फछ्र्याेट

बाँके माघ १६ गते ।
उच्च अदालत तुल्सीपुर नेपालगन्ज इजलासले चालु आर्थिक वर्षको ६ महिनामा लक्ष्यभन्दा बढी मुद्दा फछ्र्याेट गरेको जानकारी सार्वजनिक गरेको छ । उक्त इजलासले आ.व. २०८१–०८२ को साउन महिनादेखि पुस महिनाको अवधिमा ८१० थान मुद्दा फछ्र्याेट गरेको जनाएको हो ।

उच्च अदालत तुल्सीपुर नेपालगन्ज इजलासले यस वर्षको ६ महिनाभित्र कुल ७६२ थान मुद्दा फछ्र्याेट गर्ने लक्ष्य राखेको थियो तर ४८ थान बढी, अर्थात् ८१० थान मुद्दा फछ्र्याेट गर्न सफल भएको छ । सो क्रममा कुल १ हजार ७६७ थान मुद्दा दर्ता भएका थिए, जसमा ९५७ थान मुद्दा बाँकी छन् ।

बाँकी रहेका मुद्दामा ७४१ थान छ महिनाभित्र, १६३ थान छ महिनादेखि एक वर्षभित्र, ४५ थान एक वर्षदेखि अठार महिनाभित्र र ८ थान अठार महिना नाघेका छन्। दुई वर्ष नाघेका मुद्दा कुनै पनि बाँकी छैनन्। गत आ.व मा, यस अवधिमा ४७४ थान मुद्दा फछ्र्याेट भएका थिए र बाँकी रहेका मुद्दामा २१ थान दुई वर्ष नाघेका, ५५ थान अठार महिना नाघेका र १ हजार ४४५ थान एक वर्ष नाघेका थिए ।

नेपालगन्ज उच्च अदालतमा लागु औषध र जबरजस्ती करणीका मुद्दा अत्यधिक रहेको जनाइएको छ। आगामी महिनामा एक वर्ष नाघेका सबै मुद्दा फछ्र्याेट गर्ने लक्ष्य राखिएको छ। यसैगरी बॉके जिल्ला अदालतले ७३.७४५ प्रगति प्राप्त गरेको पाइएको छ । २ हजार २९७ थान मुद्दा फछ्र्याेट भएको छ र ३ हजार ९०० थान मुद्दा बाँकी छ। बाँकी मुद्दामा १३९ थान दुई वर्ष नाघेका र २७८ थान अठार महिना नाघेका छन्।