बाँके बैशाख २४ गते ।
यात्रुवाहक बसले मोटरसाइकललाई ठक्कर दिँदा एक जनाको मृत्यु भएको छ, भने एक जना गम्भीर घाइते भएका छन् ।
बाँकेको राप्ती सोनारी गाउँपालिका—१ कुसुमस्थित सौरीमा बसको ठक्करबाट मोटरसाइकलमा सवार एक जनाको घटनास्थलमै मृत्यु भएको र अर्का एक जना गम्भीर घाइते भएको प्रहरीले जनाएको छ ।
इलाका प्रहरी कार्यालय कोहलपुरका प्रमुख डिएसपी लक्ष्मी खनालका अनुसार पश्चिमबाट पूर्वतर्फ जाँदै गरेको भे ९ प. ६४२८ नम्बरको मोटरसाइकललाई सोही दिशातर्फ गइरहेको बा ०१–०६ ख. ३५९३ नम्बरको बसले बुधबार ठक्कर दिदाँ राप्ती सोनारी गाउँपालिका वडा नम्बर ९ ढकेरी निवासी अन्दाजी ३३ वर्षका सुदीप सुवेदीको घटनास्थलमै मृत्यु भएको छ ।
उनले सोही दुर्घटनामा परेर मोटरसाइकलमा सवार ढकेरीकै अन्दाजी ३५ वर्षका हिरासिंह ओली गम्भीर घाइते भएको बताइन् । घाइते ओलीलाई नेपालगन्ज मेडिकल कलेज शिक्षण अस्पताल कोहलपुरमा पु¥याएर उनको त्यहाँ उपचार भइरहेको पनि इलाका प्रहरी कार्यालय कोहलपुरले जनाएको छ ।
प्रहरीले ठक्कर दिने बस र बसका चालक शिव परियारलाई नियन्त्रणमा लिएर थप अनुसन्धान गरिरहेको छ ।
Discussion about this post