बर्दिया बैशाख ३१ गते ।
बर्दियाको ठाकुरबाबा नगरपालिकामा विन परियोजना र स्थानीयको साझेदारीमा ९ वडामा विपन्न परिवारका लागि १ सय २ घर निर्माण अन्तिम चरणमा पुगेको छ । तीमध्ये ८० वटा घर वातावरणमैत्री ऊर्जा घर निर्माण गरिएको छ । हिउँदमा अत्यधिक जाडो र बर्खामा अत्यधिक गर्मी हुने भएका कारण यी नवनिर्मित घरभित्रको तापक्रमलाई वातावरणमैत्री बनाइएको छ ।
विन परियोजनाका इन्जिनियर अभिषेक कर्णले भवन निर्माणका लागि नेपालमै पहिलोपटक एसआरआई पेन्ट प्रयोग गरी घामबाट आउने रेडिएसनलाई कम गरी गर्मीमा कम्तिमा १५ डिग्री तापक्रम घटाउने बताए । ‘यसबाहेक वाल, झ्याल, ढोका पनि हुन्छ । यसले गर्दा बाहिरबाट आउने हिटलाई कम गराउने प्रविधि प्रयोग गरिएको छ,’ उनले भने, ‘यस ठाउँको लागि वातावरणीय ऊर्जा घर निकै लाभदायक हुन्छ ।’
यस्तै ठाकुरबाबा नगरपालिकाको हरेक वडामा एकजना अपांगता भएका परिवारका लागि घर निर्माण गर्न थालेको छ । विन परियोजना अन्तर्गत ऊर्जा प्रभावकारी र वातावरणमैत्री भवनमा मुक्त कमैया, बाढीपीडित, द्वन्द्वपीडित, अपांगता भएका लगायतका परिवारका लागि पालिकाको आर्थिक सहयोगमा निर्माण भएको मेयर तिलक लम्सालले बताए ।
गर्मीमा चिसो, चिसोमा गर्मी हुने र बत्ती कम लाग्ने उक्त घर वातावरणमैत्री हुनेछन् । एक पूर्ण अपांगता भएकाका लागि ३ लाख ७५ हजार पालिकाको सहयोग र अन्य साझेदारीमा घरका निर्माण भइरहेको मेयर लम्सालले जनाए । ‘मुक्त कमैया, सुकुम्बासी, विपन्न र ०७१ को बाढीपीडित तथा वन्यजन्तु पीडितका परिवारका लागि आवास निर्माण गर्न थालिएको हो,’ उनले भने, ‘अपांगता भएका बाहेक अन्यका लागि १ लाख ७५ हजार पालिकाको सहयोग र साझेदारीमा निर्माण भइरहेको छ ।’
निर्माण सम्पन्न भएका घरमा विपन्न परिवार बस्न थालेका छन् । असार मसान्तसम्म सबै घरमा ती परिवार बस्ने भएका छन् । विन परियोजनाले स्थानीय २७ जनालाई प्रशिक्षण दिएको थियो । यसका साथै आर्थिक सहयोग र नीतिगत रुपमा ठाकुरबाबा नगरपालिकासँग सहकार्य गरी ऊर्जा प्रभावकारी भवन निर्माण गर्न थालेको कर्णले जनाए ।
Discussion about this post