बाँके साउन १० गते ।
कोहलपुर नगरपालिकाले आर्थिक वर्ष २०८१/८२ मा २७७ वटा मुद्दा फछ्र्यौट गरेको छ । ३८० वटा मुद्दा परेकोमा २७७ वटा मुद्दा मेलमिलापका माध्यमबाट फस्र्यौट गरिएको न्यायिक समितिका सदस्य सचिव आशिष वर्माले जानकारी दिए ।
१०३ वटा मुद्दा भने प्रक्रियामा रहेको उनले बताए । न्यायिक समितिमा दर्ता हुन आएका विवादहरु मध्ये लेनदेन सँग सम्बन्धित विवादहरु सबैभन्दा बढि ८६, घर जग्गा सम्बन्धी ७५, पारिवारिक मामिला सम्बन्धी ३७, बाटो सम्बन्धी २३, घरबहाल सम्बन्धी विवादहरु १३ वटा रहेका छन् ।
त्यसैगरी बाली नोक्सानी ५, अंश विवाद ५, ज्याला मजदुरी सम्बन्धी २, गाली बेईजती सम्बन्धी १ र अन्य प्रकृतिका विवादहरु ३० वटा रहेका छन् । मेलमिलापका माध्यमबाट मुद्दाको समाधान गरिने भएकाले विवादको समाधान दीघर्कालीन हुने उनले बताए । ‘न्यायिक समितिमा दर्ता हुन आएका विवादहरुमध्ये सबैभन्दा लेनदेनसँग सम्वन्धित छन् उनले भने–‘विभिन्न चरणमा दुवै पक्षलाई छलफल गराएर मुद्दाको दीर्घकालीन समाधान गरिएको छ ।’
स्थानीयस्तरमा र वडातहबाटै मेलमिलापको माध्यमबाट विवादको समाधान गर्ने उद्देश्यका साथ ७६ जना मेलमिलापकर्ताहरु सूचीकृत गरिएको छ । ‘विवादका दुवै पक्षहरुलाई जित जितको अवस्था हुने गरी विवाद समाधानमा सहभागितामूलक पद्धति अवलम्बन गरी न्यायिक निरुपण गर्ने गरिएको छ’–उनले भने ।
कोहलपुर नगरपालिका अन्तर्गतको न्यायिक समितिले १५ वटै वडामा १५ वटा मेलमिलाप केन्द्रबाट विवाद समाधानका लागि दुवै पक्षहरुको आवाज र विचारको प्रतिनिधित्व गर्दै नागरिकले न्यायको अनुभूती गर्ने गरी न्यायिक सम्पादनको कार्य गर्दै आएको बर्माले बताए ।
Discussion about this post