बाँके साउन १० गते ।
नेपाली काँग्रेसका नेता महेश आचार्यले पार्टी गुटमा विभक्त हुँदा कमजोर भएको बताएका छन् । नेपाली काँग्रेसका संस्थापक नेता एवम् प्रथम जननिर्वाचित प्रधानमन्त्री स्वः वीपी कोइरालाको ४३ औं स्मृति दिवसको अवसरमा नेपाली काँँग्रेस कोहलपुर नगर कार्यसमितिले शनिवार कोहलपुरमा आयोजना गरेको वीपी युग, चेतना र आजको राजनीतिक विषयक विचार गोष्ठीलाई सम्वोधन गर्दै उनले पार्टी गुटमा विभक्त हुँदा आम नागरिकका सवालहरु पनि ओझेलमा परेको बताए ।
उनले वीपी राष्ट्रियताको हिमायती भएको बताए । ‘राष्ट्रियता केवल भुगोल र माटोमात्रै होइन उनले भने–‘जनता पनि हुन् । वीपीले जनतालाई प्राथमिकतामा राखेर काम गर्नुभयो । उहाँ राष्ट्रियताको हिमायती हो ।’ राष्ट्रियता, प्रजातन्त्र र समाजवाद एक अर्काका परिपुरक रहेको बताए । पूर्व अर्थमन्त्री समेत रहेका नेता आचार्यले मुलुकको वृह्त्तर विकासका लागि सरकारले निजी क्षेत्रलाई प्रोत्साहित गर्नुपर्ने बताए । ‘सरकारको काम उद्योग धन्दा चलाउने होइन् उनले भने–‘उद्योगधन्दा चलाउने काम निजी क्षेत्रको हो । सरकारले वातावरण बनाइदिए पुग्छ ।’ मुलुकमा अहिले लगानी गर्ने वातावरण नभएकाले आर्थिक संकटको अवस्था सिर्जना भएको उनको टिप्पणी छ । ‘बैंंकमा अर्वौ पैसा थन्किएको छ ।
पैसा लिन कसैले मान्दैन् । लगानी गर्ने वातावरण छैन । सरकार ऋणको भारी बोकेर हिडेको छ । आर्थिक र रोजगारक गतिविधि चलायमान छैनन् । अनि कसरी मुलुक आर्थिक रुपमा सम्पन्न हुन्छ ?’–उनले भने । कार्यक्रममा नेपाली काँग्रेसका जिल्ला सभापति नारायण प्रसाद गौडेलले जनताका अधिकार प्राप्तिका लागि वीपी कोइरालाले नेतृत्वदायी भूमिका खेलेको बताए । वीपी युग समाप्त भैसकेको उल्लेख गर्दै उनले अहिले पार्टी नेतृत्व विभिन्न गठबन्धनका नाममा सत्ता र शक्तिमा केन्द्रित भएको बताए । उनले भने–‘पार्टीअहिले बिचारबिहीन अवस्थामा पुगेको छ । पार्टीलाई उपयोग गरेर कसरी शक्ति हत्याउने भन्नेमा सबैको ध्यान गयो ।
वीपीको सिद्धान्त र विचारलाई नेतृत्वले पनि विर्सियो । उनले पार्टीमा ईमानदार कार्यकर्ताको मुल्यांकन हुन छाडेको पनि गुनासो गरे । काँग्रेस लुम्बिनी प्रदेश सदस्य टेकनारायण भुषालले पार्टी नेतृत्वले वीपीको बिचारलाई बिर्सिएका कारण पार्टीमा विचलन आएको बताए । उनले पार्टीमा वीपी भन्दा पनि अन्य पार्टीका नेताहरूको चर्चा हुन थालेको टिप्पणी गरे । यस्तै अर्का पार्टीका प्रदेश सदस्य राम बहादुर मल्लले वीपीको इतिहासमात्र सम्झेर नहुने भन्दै उनको विचारलाई आत्मसात गर्नुपर्ने बताए ।
काँग्रेस महासमिति सदस्य फुलाराम थारुले काँग्रेसलाई बलियो बनाउन काँग्रेसीहरु एक हुनु पर्ने बताए । यस्तै प्रदेश सभा ‘ख’ का सभापति बलराम शर्माले वीपीको सिद्धान्त अनुसरण गर्नु अहिलेको आवश्यकता रहेको बताए । नगर सभापति वीरेन्द्र कुमार शाहको अध्यक्षतामा भएको कार्यक्रममा स्वागत मन्तव्य उपसभापति ऋषि सापकोटाले गरेका थिए भने संचालन सचिव बालकुमार शर्माले गरेका थिए ।
Discussion about this post