काठमाडौं साउन १४ गते ।
पछिल्लो समय हृदयाघातका घटनाहरू बढिरहेका छन् । यसबारे सावधान रहनु निकै महत्त्वपूर्ण छ । यसका लक्षणहरूबारे सही जानकारी पाइयो भने समयमै चिकित्सा सहायता लिएर जीवन बचाउन पनि सकिन्छ । तर प्रायःलाई महिलाहरूमा हृदयाघातका लक्षणहरू पुरुषका भन्दा फरक हुन्छन् भन्ने थाहा नहुन सक्छ ।
जसका कारण कैयौँ पटक त महिलालाई हृदयाघात भइरहेको भन्ने कुरा पनि सही समयमा पहिचान हुँदैन । यस लेखमा हृदयाघातको वेलामा महिलामा देखिने लक्षणबारे चर्चा गरिएको छ ।
छाती दुखाइ र बेचैनी
पुरुषमा हृदयाघातको सबैभन्दा सामान्य लक्षण गम्भीर छाती दुखाइ भए पनि महिलामा यो दुखाइ हल्का वा राम्रोसँग पत्ता नलागेको हुन सक्छ । केही महिलाले छातीमा दबाब, कसिलोपन वा जलन महसुस गर्छन्, जुन प्रायः ग्यास वा अपचको कारण मानिन्छ ।
घाँटी, बङ्गारा, काँध वा ढाडमा दुखाइ
हृदयाघातको समयमा महिलाको छातीको सट्टा घाँटी, बङ्गारा, काँध वा माथिल्लो ढाडमा दुखाइ हुन सक्छ । यो दुखाइ बिस्तारै बढ्न सक्छ वा अचानक तीव्र हुन सक्छ ।
सास फेर्न गाह्रो
कुनै स्पष्ट कारणविना सास फेर्न गाह्रो हुनु पनि हृदयाघातको सङ्केत हुन सक्छ । आराम गरिरहेको वा हल्का गतिविधि गरिरहेको समयमा पनि यो लक्षण देखिन सक्छ ।
एक वा दुवै हातमा दुखाइ
पुरुषजस्तै महिलालाई पनि हृदयाघातको समयमा देब्रे हातमा दुखाइ हुन सक्छ । तर कहिलेकाहीँ दाहिने हात वा दुवै हातमा पनि दुखाइ महसुस हुन्छ ।
वाकवाकी, बान्ता वा अपच
हृदयाघातको समयमा महिलामा वाकवाकी लाग्ने, बान्ता हुने, छाती जलन महसुस हुने वा अपचजस्ता पेटका समस्याहरू हुन सक्छन् । यी समस्यालाई प्रायः पेटका सामान्य समस्या हुन् भनेर बेवास्ता गरिन्छ ।
पसिना
कुनै शारीरिक गतिविधि वा गर्मीविना अचानक चिसो पसिना आउनु हृदयाघातको सङ्केत हुन सक्छ ।
रिँगटा लाग्नु
अचानक चक्कर लाग्नु, कमजोर महसुस हुनु वा बेहोस होलाजस्तो महसुस हुनु पनि हृदयाघातको लक्षण हुन सक्छ ।
असामान्य थकान
धेरै महिलालाई हृदयाघात हुनुभन्दा पहिले असामान्य थकान महसुस हुन्छ, जुन धेरै दिन वा हप्तासम्म रहन सक्छ । यो थकान यति गम्भीर हुन सक्छ कि, सामान्य कामहरू गर्न पनि गाह्रो हुन सक्छ । एजेन्सी
Discussion about this post