नेपालगन्जमा थन्किएको मल वितरण सुरु

बाँके साउन २२ गते ।
मलको चरम अभाव भएका बेला साल्ट ट्रेडिङ कर्पोरेसन लिमिटेड प्रदेश कार्यालय नेपालगन्जमा आएर थन्किएको मल वितरण गर्न थालिएको छ ।

तीन चार दिन पहिलेदेखि नै मल आउने क्रम जारी रहे पनि प्रदेश कृषि मन्त्रालयले कोटा निर्धारणको पत्र सोमबार अपराह्न मात्र पठाएपछि मल वितरण गर्न थालिएको साल्ट ट्रेडिङ कर्पोरेसन लिमिटेड प्रदेश कार्यालय नेपालगन्जका प्रमुख वासुदेव उपाध्यायले बताए । उनले सबै पालिकालाई कोटा अनुसारको मल लिन तोकिएका डिलरलाई पठाउन पत्राचार गरिएको बताए । बैजनाथ गाउँपालिका र कोहलपुर नगरपालिकाले डिलरको कोटा निर्धारण गरेर पत्र पठाइसकेको पनि उनले बताए ।

जिल्लाका अन्य छ वटा पालिकाले डिलरलाई कोटा तोकिएको पत्र पठाउने बताएको साल्ट ट्रेडिङ कर्पोरेसन लिमिटेड प्रदेश कार्यालय नेपालगञ्जले जनाएको छ । बैजनाथ र कोहलपुरले मल लग्न सुरु गरिसकेका छन् ।

कार्यालयका अनुसार प्रदेश कृषि मन्त्रालयले निर्धारण गरेर पठाएको पत्रमा बाँके जिल्लाका लागि आएको छ हजार ९७१ बोरामध्ये नेपालगन्ज उपमहानगरपालिकालाई एक हजार ५५, राप्तीसोनारी गाउँपालिकालाई एक हजार १०८, खजुरा गाउँपालिकालाई एक हजार ४६, बैजनाथ गाउँपालिकालाई ९१८, डुडुवा गाउँपालिकालाई ८१५, कोहलपुर नगरपालिकालाई ७३१ र जानकी गाउँपालिकालाई ७२० बोरा मल वितरण गर्ने कोटा निर्धारण गरिएको छ ।