बर्दिया साउन ३० गते ।
बर्दियाको बढैयाताल गाउँपालिका–६ भित्र रहेका पाँच वटा सहकारीले एकै पटक मल वितरणका लागि गत साउन २७ गते सूचना जारी गरे । बुधबार राति २ बजेदेखि कृषक मल खरिद गर्न लाइनमा बसे । प्रतिकिसान २५ किलोग्राम मल उपलब्ध गराउने सूचना जारी गरिएको भए पनि अत्यधिक चाप भएपछि मल वितरण नै गरिएन ।
आधा रातदेखि लाइनमा बसेका किसान रित्तो हात फर्कन बाध्य भए । किसानलाई तोके अनुसार मल उपलब्ध गराउन नसक्ने भएपछि अर्को सूचना नआउँदासम्म मल वितरण गर्न बन्द गरेको मैनापोखर भविष्य साना किसान कृषि सहकारी संस्थाका अध्यक्ष विष्णु लम्सालले बताउनुभयो । “आधा रातदेखि मलका लागि लाइन बसे पनि रित्तो हात फर्कनु प¥यो,” बढैयाताल गाउँपालिका–६, मैनापोखरका जगतु थारूले भन्नुभयो, “आज मल लगेर खेतमा हाल्छु भन्ने ढुक्क थिएँ, सपना नै भयो ।”
दिनभर लाइनमा बसेर सहकारीबाट छ किलोग्राम युरिया पाएकी मधुवन नगरपालिका–७, शुक्र बस्तीकी शान्ति अधिकारीले बेग्लै व्यथा पोख्नुभयो । एक बिघा १० कट्ठा खेतमा धान लगाएकी उहाँले भन्नुभयो, “यति मल कता हाल्ने हो ? यसपालि त धानै नफल्ने हो कि भन्ने चिन्ता छ ।” तीन हजार आठ सय कृषक सेयर सदस्य भएको ताराताल साना किसान कृषि सहकारी संस्थामा धानका लागि ३६८ बोरा मात्र युरिया आयो ।
युरिया माग गरेका किसानबिच बराबर भाग लगाउँदा छ किलोग्राम मात्र युरिया दिन सकिएको ताराताल साना किसान कृषि सहकारी संस्थाका प्रबन्धक राजन थापाले बताउनुभयो । गुलरिया नगरपालिका–३ मा रहेको कल्पतरु कृष्णसार कृषि सहकारी संस्थामा चार सय कृषकका लागि ५२ बोरा युरिया आएको अध्यक्ष चिन्तामणि कँडेलले बताउनुभयो । एक बोरा मल पाँच जना कृषकले बाँडेर लगेको बताउँदै प्रहरी नै परिचालन गरेर मल वितरण गरेको तितो अनुभव सुनाउनुभयो
।बर्दिया जिल्लामा जताततै रासायनिक मलको हाहाकार भएको छ । किसान रासायनिक मलको खोजीमा भौँतारिइरहेका छन् । मागभन्दा निकै कम मल प्राप्त हुँदा कतिपय सहकारीले मल नै लैजान आनाकानी गर्ने गरेका छन् ।
Discussion about this post