बाँके भदौ १९ गते ।
सशस्त्र प्रहरी बल लुम्विनी प्रदेशका प्रमुख डिआइजी दिपेन्द्र कुँवर यतिबेला बाँके र बर्दियाको निरीक्षणमा छन् । आफू मातहतका कर्मचारीले गरेको कामको मूल्यांकन गर्न र निर्देशन दिन उनी जिल्ला दौडाहामा छन् । उनले तस्करी नियन्त्रण गरि राजस्व बढाउन निर्देशन समेत दिँदै आएको सशस्त्र प्रहरीका एक उच्च अधिकारीले बताए ।
तस्करी नियन्त्रण उनको पहिलो प्राथमिकतामा छ । उनले तस्करी नियन्त्रणमा सघाउ पुर्याउन भन्दै जयसपुर विओपीमा कार्यरत सोमराज शर्मालाई घुमुवाको रुपमा परिचालन समेत गरेका छन्, तर डिआइजीले परिचालन गरेका शर्मा सूचना संकलनभन्दा तस्करसँग पैँसा असुल्न ब्यस्त छन् ।
उनी आफूलाई राजनीतिक संरक्षण र सशस्त्र प्रहरीका लुम्विनी प्रदेश प्रमुख डिआइजी कुँवरको आशिर्वाद भएको ठोकुवा गर्छन् । उनको पद सशस्त्र प्रहरी सहायक निरीक्षक हो, तर उनी आफूभन्दा ठूला दर्जाकालाई समेत धम्क्याउँछन्, थर्काउँछन् । ‘राजनीतिक र डिआइजीको शाशिर्वाद भएको भन्दै शर्मा जीले हामीलाई समेत टेँर्दैनन्,’ एक अधिकृत स्तरका सशस्त्र प्रहरीले भने, ‘कसैले केहि गर्न नसक्नेभन्दै उनी सवैलाई हपार्छन् र टेँर्दैनन् ।’
डिआइजी कुँवर निरीक्षणका लागि बाँके आएकै दिन समेत तस्करी रोकिएन । डिआइजी कुँवरको निर्देशनलाई लत्याउँदै विओपी र उनले घुमुवाको रुपमा खटाएका शर्माको टोली तस्करसँग पैँसा लिएर अवैध रुपमा सामान भित्र्याउन सहयोग गरिरहेका थिए । शर्माले मिडियामा आउँदैमा केहि नविग्रने ध्वाँस समेत देखाउँदै आएका छन् । ‘मेरो विरुद्ध लोकल मिडियामा समाचार आएर केहि विग्रिदैन । राष्ट्रिय मिडियामा आए पो मलाई फरक पर्ला,’ उनले आफ्नै संस्थाका सिनियर अधिकृतसँग भन्ने गरेका छन्, ‘जवसम्म मलाई डिआइजी सावको आशिर्वाद रहन्छ कसैले केहि विगार्न सक्दैन ।’
डिआइजी कुँवरले परिचालन गरेका कारण शर्माको बारेमा समाचार आउँदासमेत सशस्त्र प्रहरी बल ३० नं. गण हेडक्वार्टर बागेश्वरीका गणपति एसपी शोभाकान्त खनालले समेत शर्मालाई संरक्षण गर्दै आएका छन् । एसपी खनाललाई शर्मा यसअघि विवादमा परेको र छवि राम्रो छैन भन्ने पूर्ण जानकारी छ, तर उनी डिआइजीले परिचालन गरेकोले कुनै एक्सन लिन नसकेको स्रोतले जनाएको छ । ‘डिआइजी सावले परिचालन गरेको ब्यक्ति भएकोले एसपी सावलाई डर लागेको हुनु पर्छ’ एक अधिकृतले भने, ‘शर्मा विवादित कर्मचारी भएको र उनको छवि राम्रो नभएको पूर्ण जानकारी छ, तर उहाँले जानेर पनि केहि गर्न सक्नु भएको छैन । यो उहाँको बाध्यता हो ।’
यसअघि घुमुवा बस्दा शर्माले तस्करसँग मोटो रकम लिएको उजुरी परेको थियो । सोही उजुरीको आधारमा उनलाई सशस्त्र प्रहरी प्रधान कार्यालयले कारवाही स्वरुप अन्यत्र सरुवा गरेको थियो । तर, उनी पावरको बलमा सरुवा मिलाएर फेरि बाँके आएका छन् । बर्दियाबाट बाँके आउने वित्तिकै पैँसा र पावरको बलमा उनी फेरि घुमुवाको रुपमा परिचालन भएका छन् । ‘शर्माले आफ्नो छवि त विगारेका छन् नै उनले डिआइजी कुँवर र एसपी खनालको समेत बदनाम गरिरहेका छन्,’ सशस्त्र प्रहरीका एक अधिकृतले नाम उल्लेख नगर्ने शर्तमा अनलाइन खोजखवरसँग भने ।
सशस्त्र प्रहरी बल प्रधान कार्यालयले उनलाई अनुचित गतिविधि नगर्ने शर्तसहित बाँके पठाएको छ । तै पनि आउने वित्तिकै उनी तस्करसँग मोटो रकम अशुल्न थालेका छन् । ‘नानीदेखि लागेको बानी, कहिँ नजानी’ भन्ने उखान झैँ तस्करसँग मोटो रकम असुल्न पल्केका उनी फेरि आफ्नो हर्कत देखाउन थालेको तस्कर बताउँछन् ।
सशस्त्र प्रहरी बलले घुमुवा नराख्ने नीति अघि सारेको छ, तर गण र विओपीले आफूखुसी घुमुवा परिचालन गरेको अनलाइन खोजखवरले सूचना प्राप्त गरेको छ । जयसपुर विओपीले शर्मासहित सात जना घुमुवा परिचालन गरेको सशस्त्र प्रहरी स्रोतले जनाएको छ । ‘बदनाम हुनबाट जोगिन डिआइजी साव र एसपी खनाल सावले विवादित कर्मचारीलाई घुमुवाबाट हटाउन जरुरी छ,’ एक अधिकृतले भने ।
Discussion about this post