बाँके असोज १९ गते ।
विजयादशमीको अवसरमा दुर्गामाताको मूर्तिहरू विसर्जन गर्ने क्रममा जिल्लाका विभिन्न स्थानमा दुई समुदायबीच झडप भएपछि बाँके प्रशासनले केही क्षेत्रलाई निषेधित क्षेत्र घोषणा गरेको छ।
धार्मिक र सामाजिक सद्भावमा खलल पुग्ने अवस्था देखिएपछि उत्पन्न सुरक्षाजन्य चुनौतीलाई मध्यनजर गर्दै शनिबार साँझ ७ बजेदेखि अर्को आदेश नआएसम्मका लागि बाँकेका विभिन्न स्थानमा निषेधाज्ञा जारी गरिएको प्रमुख जिल्ला अधिकारी धर्मराज जोशीद्वारा जारी सूचनामा उल्लेख छ। प्रशासनका अनुसार डुडुवा गाउँपालिका–६ हिरमिनियामा मूर्ति विसर्जनको क्रममा विवाद चर्किएपछि केही घुम्ती पसल र एक पुरानो मोटरसाइकलमा आगजनी भएको थियो।
त्यस्तै, सोही गाउँपालिकाको सुब्बापुरवा क्षेत्रमा समेत दुई सम्प्रदायबीच आपसी झडप भएको जानकारी प्राप्त भएको छ। स्थिति थप विग्रन नदिन डुडुवा गाउँपालिका वडा नम्बर ६ को सम्पूर्ण क्षेत्र, नेपालगन्ज उपमहानगरपालिका वडा नम्बर १४ को सम्पूर्ण क्षेत्र, नेपालगन्ज उपमहानगरपालिका वडा नम्बर १५ को सुइया पिप्रहवा, नेपालगन्ज उपमहानगरपालिका वडा नम्बर २३ का भजिपुरवा, जंगलिपुरवा र लोहरनपुरवा र नरैनापुर गाउँपालिका वडा नम्बर ५ को सम्पूर्ण क्षेत्रलाई निषेधाज्ञा जारी गरिएको छ ।
स्थिति नियन्त्रणमा लिन र शान्ति सुव्यवस्था कायम राख्न स्थानीय प्रशासन ऐन २०२८ (संशोधित) को दफा ६ (१) (क) र ३ (क) बमोजिम प्रशासनले निषेधाज्ञा जारी गरेको हो। निषेधाज्ञा अवधिमा पाँच जनाभन्दा बढी व्यक्ति भेला हुन, जुलुस, सभा वा प्रदर्शन गर्न रोक लगाइएको छ। सूचनामा भनिएको छ, “निषेधित क्षेत्रभित्र पूर्वस्वीकृति बिना पाँच जनाभन्दा बढी व्यक्ति आवतजावत वा भेला भएमा सुरक्षाकर्मीले नियन्त्रणमा लिई कानुन अनुसार कारबाही गर्न सक्नेछन्।”
प्रमुख जिल्ला अधिकारी धर्मराज जोशीले सबै नागरिकलाई शान्ति, सद्भाव र सामाजिक एकताको वातावरण कायम राख्न आग्रह गर्दै अफवाहमा नलाग्न अनुरोध गरेका छन्।
Discussion about this post