बाँके असोज १९ गते ।
हिन्दुको महान् पर्व बडादसैँ मनाउनका लागि यस वर्ष दुई लाखभन्दा बढी नेपाली जमुनाह नाका भएर भारतबाट स्वदेश फर्किएका छन् ।इलाका प्रहरी कार्यालय जमुनाहका अनुसार असोज १ देखि १६ गतेसम्म जमुनाह नाका हुँदै दुई लाखभन्दा बढी नेपाली स्वदेश फर्किएका हुन् ।
इलाका प्रहरी कार्यालय जमुनाहका इन्चार्ज प्रहरी निरीक्षक उपेन्द्रबहादुर बुढाथोकीले सो अवधिमा जमुनाह नाका भएर करिब एक लाख मानिस नेपालबाट भारत गएको पनि बताए । प्रहरीले पर्वलक्षित यात्रु सहायता कक्ष स्थापना गरेका कारण सीमा क्षेत्रमा आउने यात्रुका लागि सहज भएको थियो ।
नाकामा भिड अत्यधिक बढेपछि यात्रु ठगिने र अन्योलमा पर्ने गुनासा आएपछि प्रहरीले पर्वलक्षित सुरक्षा हेल्प डेस्क स्थापना गरेर यात्रुलाई विभिन्न सहयोग तथा सूचनाका सेवा प्रदान गरेको हो ।
होटेल व्यवसायी सङ्घ बाँकेका अध्यक्ष भीम कँडेलले भारतबाट आउनेलाई होटेल व्यवसायी, रिक्सा, अटो र गाडीचालकले समेत ठग्न थालेको गुनासो व्यापक भएपछि प्रहरीको सहयोगमा नाकामै बसेर निगरानी बढाइएको र यात्रुलाई ठगिनबाट जोगाइएको बताए ।
विदेशमा बस्दा नेपाली सुरक्षित हुने तर आफ्नो मुलुकमा पुगेपछि ठगिने पीडा एकदमै गलत भएको उनले बताए। रोजगारीको उद्देश्यले भारतको टिहरी गढवाल पुगेर दसैँ मनाउन फर्किएका दैलेख नौमुलेका दीपक थापाले अर्काको देशमा गएर काम गर्न निकै गाह्रो भएको र स्वेदश आउँदा नाकामै नेपालीबाट पीडित हुनुपर्दाको तितो अनुभव सुनाए । उनले अब देशमै केही काम पाउने र गर्ने वातावरण बन्नुपर्नेमा पनि जोड दिए ।
Discussion about this post