बाँके कात्तिक २१ गते ।
जेनजी आन्दोलनका क्रममा बाँकेको बैजनाथ गाउँपालिकामा रहेको नौबस्ता बाल सुधार गृहबाट भागेका ७८ जना बालबन्दीमध्ये ३६ जनालाई पक्राउ गरिएको छ ।
नौबस्स्ता बाल सुधार गृहका प्रमुख श्यामबहादुर रानाले दिएको जानकारी अनुसार भदौ २४ गते राति प्रहरीसँग भिडन्त गरेर भागेका ७८ जना बालबन्दीमध्ये ३२ जनालाई बाँकेका विभिन्न स्थानबाट, तीन जनालाई चितवन र एक जनालाई काभ्रेबाट पक्राउ गरिएको हो ।
उनले पक्राउ गरिएकामध्ये तीन जनालाई चितवन कारागार र एक जनालाई काभ्रे जिल्लाको कारगारमै राखिएको पनि बताए ।
बाल सुधार गृहबाट भागेका मध्ये ४२ जना अझैपनि फरार रहेको जनाउँदै सुधारगृहका प्रमुख रानाले उनिहरुको खोजी गर्ने कार्य प्रहरीले गरिरहेको बताए।
जेनजी आन्दोलनको दोस्रो दिन भदौ २४ गते राति प्रहरीसँग भिडन्त गरेर ७८ जना बालबन्दीहरू सो बाल सुधार गृहबाट भागेका थिए । भाग्ने क्रममा प्रहरीले गोली प्रहार गर्दा अछामका २१ वर्षीय उमेश विष्ट, दाङका २० वर्षीय बिनेश घर्ती मगर, बाँकेका २० वर्षीय समिर थापा, दैलेखका २१ वर्षीय भुपेन्द्र खत्री र कैलालीका १९ वर्षीय जगत देउवाको मृत्यु भएको थियो भने दुई जना घाइते भएका थिए ।
फरार भएका बालबन्दी लगायत सबै प्रकारका कैदीबन्दीहरूलाई बाल सुधार गृह र कारागारमा फर्किनका लागि गत असोज २० गतेसम्मको समयसीमा दिइएको थियो । सो समयसीमा पूरा भएको एक महिना नाघेपनि ४२ जना बालबन्दीहरु पक्राउ नपरेको नौबस्ता बाल सुधार गृहले जनाएको छ । हालसम्म पक्राउ नपरेकाहरूलाई कारागार ऐन अनुसार कारबाही हुने बताइएको छ ।
Discussion about this post