बाँके पुस ४ गते ।
बाक्लो शीतलहर तथा कुहिरोका कारण भिजिविलेटी अत्यन्त कम हुँदा शुक्रवार दिउँसोसम्म नेपालगन्ज विमानस्थल बन्द रहेकोले हवाइ उडान अवरुद्ध भएको नागरिक उड्डयन कार्यालय नेपालगन्जले जनाएको छ ।
शुक्रबार विहानैबाट चलेको शीतलहर तथा हुस्सु कुहिरोका कारण ५०० देखि ७०० मिटर मात्र भिजिविलेटी हुँदा विमानस्थल बन्द रहेकोले नेपालगन्जबाट दिउँसोसम्म कुनै पनि उडान नभएको नागरिक उड्डयन कार्यालयले जनाएको छ ।
हवाई उडानका लागि आवश्यक पर्ने भिजिविलेटी नहुँदा उडान शुरु गर्न नसकिएको विमानस्थल टावरले जनाएको छ । नेपालगन्ज विमानस्थलको टावरले दिएको जानकारी अनुसार जहाज उडाउन एक हजार भिजिबिलेटी हुनु पर्ने र जहाज उतार्नका लागि एक हजार ६०० भिजिबिलेटी हुनुपर्नेमा शुक्रवार दिउँसो १२ बजेसम्म ७०० भन्दा बढी भिजिबिलेटी नभएकोले उडान शुरु गरिएका छैनन्।
विमानस्थल बन्द रहेकोले यहाँबाट पहाडि जिल्लाका लागि विहान हुने सबै उडान रद्द गरिएक छन् भने काठमाडौंका लागि हुने सबै उडान अवरुद्ध भएका छन् । नेपालगन्जका लागि विहान ८ बजे काठमाडौंबाट जहाज उड्ने नियमित तालिका भएपनि नेपालगन्ज विमानस्थल बन्द रहेका कारण जहाज नउडेको बुद्ध एअर नेपालगन्जका प्रमुख विनित विक्रम शाहले बताए । उनले नेपालगन्ज विमानस्थल खुलेपछि मात्रै काठमाडौंबाट जहाज उडाइने जानकारी दिए ।
नेपालगन्जबाट काठमाडौंका लागि श्री एयरलाइन्सले चार, बुद्ध एयरलाइन्सले चार र यति एयरलाइन्सले दुई वटा नियमित उडान गर्दै आएको छ । सोही प्रकारले नेपालगन्जबाट पहाडी जिल्लाहरुमा पनि विहान बढी उडान हुने गरेको थियो ।
नेपालगन्ज विमानस्थलबाट हवाई उडान अवरुद्ध हुँदा काठमाडांै र पहाडी जिल्लामा यात्रा गर्न जाने यात्रुहरु समस्यामा परेका छन् । टिकेट लिएका अधिकांश यात्रुहरु जहाजको प्रतिक्षामा विमानस्थलमा रोकिएका छन् । गत केही दिनयता आएर शित लहर र कुहिरोका कारण बिहान हुने उडानहरु प्रभावित हुँदै आएका थिए भने शुक्रवार दिउँसो सम्म पनि कुनै उडान हुन नसकेको विमानस्थलले जनाएको छ ।
Discussion about this post