बाँके–२ बाट जसपाको समानुपातिकमा श्रवण यादव सिफारिस

बाँके पुस १३ गते ।
जनता समाजवादी पार्टी नेपाल (जसपा)ले बाँके जिल्ला निर्वाचन क्षेत्र नम्बर २ बाट प्रतिनिधि सभा सदस्यका लागि समानुपातिक मधेशी तर्फ प्रभावशाली युवा नेता श्रवण कुमार यादवको नाम सिफारिस गरेको छ। जसपा नेपाल लुम्बिनी प्रदेश समितिले यादवको नाम पहिलो नम्बरमै केन्द्रीय कार्यसमितिमा सिफारिस गरेको हो।

प्रदेश समितिको बैठकमा पार्टी संगठन सुदृढीकरण, स्थानीय तहमा पार्टीको प्रभाव विस्तार, समावेशी प्रतिनिधित्व तथा युवाको भूमिकालाई प्राथमिकता दिने विषयमा विस्तृत छलफल गरिएको थियो। सोही छलफलका आधारमा सक्रिय, लोकप्रिय र संगठनमा निरन्तर योगदान दिँदै आएका यादवलाई उम्मेदवारका रूपमा अघि सारिएको पार्टी स्रोतले जनाएको छ। बाँकेसहित लुम्बिनी प्रदेशका विभिन्न जिल्लामा प्रभाव पार्न सक्ने क्षमताका कारण पनि उनको नाम सिफारिस गरिएको बताइएको छ। युवा नेता यादव लामो समयदेखि जसपा नेपालको संगठन निर्माणमा सक्रिय रहँदै आएका छन्। उनी उत्पीडित तथा उपेक्षित वर्गको हक–अधिकार, पहिचानको मुद्दा, सामाजिक न्याय तथा समावेशी राजनीतिका पक्षमा निरन्तर आवाज उठाउँदै आएका नेता हुन्।

मधेशी, मुस्लिम, दलित, आदिवासी जनजाति, थारु, अपाङ्गता भएका व्यक्ति, महिला तथा युवा सशक्तीकरणका विषयमा उनी सक्रिय रूपमा संलग्न रहँदै आएका छन्। स्थानीय स्तरमा जनसम्पर्कमा सक्रिय यादव विभिन्न सामाजिक अभियान र पार्टीका आन्दोलनहरूमा अग्रपंक्तिमा देखिँदै आएका कारण पार्टीभित्र र कार्यकर्ता–समर्थक माझ उनको नाम सिफारिसलाई सकारात्मक रूपमा लिइएको छ।

जसपा नेपालले यसपटकको निर्वाचनमा नयाँ अनुहार र युवा शक्तिको सहभागिता बढाउने रणनीति लिएको बताउँदै आएको छ। सोही रणनीतिअनुसार लुम्बिनी प्रदेश समितिबाट यादवको नाम सिफारिस हुनु पार्टीको दीर्घकालीन राजनीतिक दृष्टिकोणसँग मेल खाने नेताहरूको भनाइ छ।