बाँके पुस १३ गते ।
नेपालगन्जमा आज बृहत् रक्तदान कार्यक्रम सम्पन्न भएको छ। “सेवा नै धर्म हो” भन्ने मूल नारासहित गौरव स्मृति तथा वि. योर सेल्फ फाउण्डेशनको संयुक्त आयोजनामा भएको रक्तदान कार्यक्रममा १०१ जनाले रक्तदान गरेका छन् ।
संस्थाका संस्थापक अध्यक्ष स्वः गौरव शाहको जन्मदिनको अवसरमा रक्तदान कार्यक्रम आयोजना गरिएको फाउण्डेशनका संरक्षक प्रदीप शाहले जानकारी दिए । उनका अनुसार फाउण्डेशनले बाँके जिल्लामा सामाजिक तथा मानवीय सेवाका विविध कार्यहरु गर्दै आएको छ । पछिल्लो चार वर्षदेखि नियमित रुपमा रक्तदान कार्यक्रमलाई निरन्तरता दिँदै आएको उनले बताए ।
संरक्षक शाहले रगतको अभावका कारण कसैले पनि ज्यान गुमाउन नपरोस् भन्ने उद्देश्यले रक्तदान कार्यक्रम सञ्चालन गरिएको बताए । नेपालगन्जमा प्रायः समय रगतको अभाव रहने र विशेषगरी पहाडी जिल्लाबाट उपचारका लागि आउने बिरामीलाई थप समस्या हुने गरेको उल्लेख गर्दै उनले त्यस्ता नागरिकलाई सहयोग पु¥याउने उद्देश्यले रक्तदान गर्दै आएको बताए ।
कार्यक्रममा सहभागी रक्तदाताहरुले मानवीय सेवामा योगदान गर्न पाएकोमा खुसी व्यक्त गरेका थिए भने आयोजक संस्थाले आगामी दिनमा पनि यस्ता मानवीय कार्यक्रमलाई निरन्तरता दिने प्रतिबद्धता जनाएको छ।
Discussion about this post